إغلاق القائمة
هتتفاجئ لما تعرف محتويات قائمة المنقولات الزوجية فى كرداسة
-

هتتفاجئ لما تعرف محتويات قائمة المنقولات الزوجية فى كرداسة

اخر تحديث :
    ماهى محتويات قائمة المنقولات الزوجية فى كرداسة ؟
    ماهى محتويات قائمة المنقولات الزوجية فى كرداسة ؟


    هنا فى موقع تجارب كوم كان سؤال تجربتنا : ماهى محتويات قائمة المنقولات الزوجية فى كرداسة ؟ وتم تصفية اهم الاجابات ووضعها بين يديك لتساعدك على موقع تجارب كوم تم تقسيم الاجابات كل تجربة ورأى فى فقرة اى ان كل فقرة تعبر عن راى شخص واحد فقط

    سؤال الموضوع :


    الراجل إللي بيساعدني في البيت بيجوز بنته، دي الطلبات إللي مطلوبة منه، وإللي لازم يجيبها وإلا بنته متتجوزش، كرداسه كلها كده على حسب كلامه هو ومراته، لازم بس تعرفوا إن البنت هناك لو عدت ٢٠ سنة بيعتبروها عانس ولو كملت تعليم ودخلت جامعة يبقى تتجوز من بره كرداسه، الطلبات دي مفيهاش فصال، لإنها لو مجتش بيعايروا بعض باقي العمر مراته بتقولي انا بجوز بنتي ولحد دلوقتي بتعاير علشان كان في حاجات ناقصة وانا بتجوز.

    انا هكتبلكم المطلوب زي ما قالوهولي بالحرف، وعندي شوية اسئلة، لييييييه كل ده؟ هيحصل إيه لو الأولاد ابتدوا حياتهم من غير الحاجات دي؟ العادات إللي بتهلك الناس ماديًا دي هتنتهي إزاي؟ بالمناسبة الراجل ده ومراته لو أي حد شافهم في الشارع هيصنفهم من الطبقة البسيطة المطحونة، ده نموذج لعادات وتقاليد لازم تتغير علشان الناس متفضلش مديونة باقي عمرها، لانها عليها التزامات حاجات مالهاش معنى وممكن بسهولة الاستغناء عنها، ومش مزايدة على حد، لكن نموذج يستحق الوقوف عنده بصراحة، بوست طويل شوية معلش، بس اقروا واستعجبوا معايا.

    - فريزر
    - ديسبينسر
    - ميكروويف
    - ٢ بوتاجاز خمسة عين، واحد ليها وواحد لحماتها 
    - فرن الخبيز 
    -انبوبتين
    - بابورين شاي 
    - ٢مكواه واحدة بخار وواحدةعادية 
    - ٢خلاط واحد عادي رخيص ٦٠٠ جنيه والكامل ب٢٥٠٠
    - مروحتين 
    - ٢ غسالة واحدة نص اوتوماتيك وواحدة اتوماتيك كاملة 
    - شواية بالكهربا
    - دفاية بالكهربا 
    - مبرد بالتلج 
    - ٢ كاتيل 
    -٢ حافظة طعام 
    -طقم تيفال
    - طقم نوفال
    - طقم حلل سيراميك
    - طقم الومنيوم تقيل بودان 
    - طقم ستانلس بودان
    - حلة ضغط 
    -طقم حلل فلاحي ١٦ حلة 
    - ٣ عدد شاي 
    - ٣ اطقم صواني كيكة 
    - طقمين توزيع في المطبخ
    - شنطة معالق وسكاكين 
    - طقم سكاكين ومعالق إللي بره الشنطة 
    - ٦ كنكات
    - ٦ لبانات 
    - طقم التوابل 
    - طقم السكريات 
    - طقم الخشاف 
    - إزاز للمطبخ بالف جنيه (تقصد الكبايات) 
    - طقم اطباق لازم يكون ١٠٠ صحن
    - ألف جنيه ورد نزين بيه الشقة 
    - ٣٥ ملايه 
    - ٥ بطاطين قطيفة 
    - مفرشين سرير قطيفه
    - مفرشين سرير ستان 
    - لحافين فايبر صغيرين ولحاف كبير 
    - لحافين سرير بتوع يوم الدخلة 
    - ٦ دفاية بتاعة السراير 
    - ٢ حافظة سجاد 
    - طقمين سجاد فرش حمام 
    - ٤ علب فوط صغيرة العلبة فيها ٤ 
    - ٨ كراتين فوط كل كرتونة فيها ٥ 
    - ٤ فوط قطيفة 
    - دباديب لاوضة النوم
    - طقم حصير للصيف 
    - طقمين سجاد للشقة 
    - حاجة النيش (طقم الفطار _ملك النيش اللي هو طقم شاي ، واربع اطقم كاسات مختلفين، طقم الاركوبال، طقم الصيني ميقلش على ٧٠٠٠ جنيه وطقم بيركس، و٢ ترمس و٢ كولمن) 
    - الحاجات البلاستيك ب٥٠٠٠ جنيه 
    -منشر غسيل 
    -شاشتين واحدة كبيرة في الصالة، وواحدة صغيرة لاوضة النوم 
    - لو العريس مجابش كمبيوتر هي بتجيبه 
    - ١٠ عبايات خروج قماش والعريس بيدفع التفصيل 
    -هدومها الداخلية ٥٠٠٠ جنيه 
    - هدوم للعروسة ب ١٠ الاف جنيه 


    يوم الفرح لازم لازم يودوا بيت العروسة الحاجات دي 


    - ٥ باكتات بيبسي ليها ولحماتها 
    - كرتونة لبن عبور لاند 
    - كرتونتين عصير 
    - سوداني وبونبوني وشوكولاته .
    - ٢ كرتونة شيبسي
    - كرتونة جبنه عبور لاند
    - علبتين عسل اسود وعلبة عسل نحل وشاي ولفة سكر ولفة رز وحاجات العطارة 
    - ١٠ كيلو بصل 
    - ١٠ كيلو طماطم وخمسة كيلو توم 
    - وجوز بط وخمسةمكرونة وخمسة شعرية وخمسة خيار وكل الخضار اللي في السوق يروح منه خمسة كيلو 
    - ٢ صينية مكرونة بالبشاميل 
    - ٢ صينية جلاش باللحمة 
    - جوزين حمام 
    - فرختين أو جوز بط 
    - ٣ كيلو كفته 
    - ٢ صينية بسبوسة 
    - ٢ صينية جلاش 
    - ٢ صينية كنافة 
    - ٢ كيكة 
    - قرص وبسكويت وبيتي فور 

    الطلبات دي معديه ٢٠٠ ألف جنيه، ومفيش حد في كرداسة متنازل عنها، حد يفهمني ده إسمه إيه. مستنية تفاعلتكم



    ودى كانت الاجابات ووجهات النظر حول الموضوع

    والمحروس بيجيب ايه بقي ان شاء الله لما العروسة بتجيب كل ده؟!
    اقسم بالله لو الكلام ده عندي مااتجوز مع العلم اني مش عايزة اتجوز في المعقول بتاع الناس هتجوز في الجنان ده؟!
    البنات مبتشتغلش ولو اشتغلت متقدرش تجيب كل ده ده انتوا كده بتموتوا الناس بالبطيئ 
    تخلف وجنان والله لو حد قالي كده في وشي لاجيبه نصين قال 200 الف جنيه قال لا بسيطة

    فعلا حقيقي الست اللي كانت بتساعدني هي ساكنه في المرج جابتلي كشف الحاجه اللي جبتها لبنتها ...اتخضيت والله اهلي حتي مجهزونيش كده جايبه أحدث الحاجات و بدل طقم الحلل ٣ جرانيت و تيفال و ستانلس ...و جايبه ٣ أطقم توابل و من كل حاجه ٣ انواع ..و المهم داخل جامعيات و مدينه للركب ....سبحان الله

    وهو هيعمل ايه لما هي تجيب كل ده ! .. شايف انه جوازها منه كده شرف وخلاص تعب اوي يا عيني وهو بيمضي عالقسيمه وينولها الشرف ده ! .. وليه تصرف ع حماتها هي مش عندها نطع يصرف عليها ولا متجهزتش والناس لسه بتعايرها هي كمان فهتخلي البت تجهزها ع كبر ؟

    الي شاغلني بس كام تفصيله كده لو عرفتهم هتفضل تفكر والموضوع مش هيطلع من دماغك :
    اولا ليه 6 لبانات هيعملوا بيهم ايه حد يقولي.
    ثانيا هدوم العروسه الداخليه ب 5000 جنيه  هوا واضح انها عامله حساب انها هتستقبل ضيوف كتييير يباركولها وهتستقبل الضيوف بيهم 
    ثالثا اشمعنا كرتونه لبن عبور لاند يعني لو جابوا المراعي او مزارع دينا مثلا هيحصل ايه الجوازه تبوظ 
    رابعا 2 بوتجاز خمسه عين واحد ليها وواحد لحماتها ليه بقي تتحرق العروسه وامها 
    والله العظيم ياجماعه الجواز وطلباته ابسط من كده بكتييير وربنا هيحاسب الناس إلي بتطلب كل ده ' انتوا فاكرين الغارمين والغارمات بيجوا منين والسرقه والتحرش ماهو من ام الطلبات التعجيزيه دي

    الجهل والتخلف والفشخره الكذابه وبعدين يقولوا ساعدوا الغارمات ، يجب تطهير العقول من الجهل اولا وهذا يأتي باءصلاح التعليم اولا وتطوير العقل بس للأسف مفيش فايده

    كل اللي موجودين معترضين اللي بيتجوز بقي بالشكل ده من كوكب تاني ولا عشان البوست اخد شكل دردشه وتسليه انا متاكد 95% من الموجودين عندهم نفس الحاجات واكتر والموضوع ده مش في كرداسه بس هو شكله مختلف في كرداسه بس كله عنده نفس الكلاكيع بتاع الجواز بالشكل ده لاننا في دوله عقيمه لو حبينا نمشي بما يرضي الله نقول ساعتها لا اصل بنتي مهندسه او دكتوره مينفعش تتجوز بالشكل ده ولو اتكلمنا وقولنا وضع الحياه صعب هيتقال ممعكش مكنتش تيجي ولو قولنا نعيش علي قدنا وانتي بتشتغلي وابوكي او جدك كان بسمجي يتقال احنا ولاد انهارده أتمنى من معظم البنات او الاباء والامهات اللي حضروا البوست ده يوم مايجوا يجوزوا بنتهم او ابنهم يصروا علي رايهم ده ويتقوا ربنا في البنت او الولد اللي هيتجوز والام اللي عايزه بنتها تعمل حنه 3 او 4 ايام عشان تعيش يومها وتقعد تستلف وتشحت ياريت يكوم في كرامه وتمشي علي قدها والاب اللي بيتكلم ويقول انا جايب لبنتي اغلي حاجه واحلي انواع ياسيدي الفاضل ربي بنتك وعرفها تعيش الحياه ازاي بنات اليومين دول اقسم بالله في حاجات في فرش بيتهم لابيعرفوا يستخدموها ولا يعرفوا انها موجوده اساسا ياريت الناس متدايقش من راي ويكونوا قد تعليقاتهم اللي قالوهوا ويعملوا بيها وميقولش جمله الضعف والوضاعه 

    احنا عندنا في الشرقيه نفس الشيء والزياده انها يوم الصباحيه لازم تعكى لحماتها وعماتها اللى هما اخوات زوجها هدايا عباره عن بطانيه مزدوجه 8 كيلو ونهارهم ازرق لو كانت 6 العبايات بقي هيا اللي بتجيبها وممكن تصل الى 30 عبايه والاهل فعلا يفضلوا مديونين ومفيش حد بيغير تفكيره

    اعتقد فى " الراجل الى بيساعدنى فى البيت " دى معناها الخدام بتاع حضرتك بطريقة متحضرة ! الحقيقة انا عندى سؤال و طبعا حضرتك مش مجبرة ابدا تردى عليا ، بس اتمنى تجاوبى بينك و بين نفسك حضرتك تقدرى توفرى شويه  الحاجات دى ؟ مش بقول انك تشترى الحاجه للراجل بس لو قولنا ان الطلبات دى مطلوبة من بنتك الى اتكفت على وشها و حبت واحد من مجتمع تانى عنده نفس الدماغ دى  هتقدرى توفرى الحاجات دى فى جهاز بنتك  لو الاجابة ان ايوا تقدرى ، استأذن حضرتك متتكلميش تانى عن الاسعار ولا عن التعجيز ولا الأزمة الاقتصادية ولا الوضع المادى ولا تتكلمى على كتر الطلبات فى الجواز 

    يجماعه دي مش المنطقة اللي بتتكلم.عليها بس جميع القري والمراكز فيها التخلف والجهل ده والشرقية اكبر محفظة فيها التخلف ده واكتر من كدا كمان الناس اللي عيشا في المدينة دول حلوين اوووي ربنا يهديهم 50 الف ممكن يجهز العزال هنا. المطبخ بيتحط فيه 50 الف بس ؟

    على فكره يادكتور مبيعملش كده غير الطبقه المتوسطه والاقل كمان والجهله وفى الارياف لان شوفت ده بعينى اما الطبقه المثقفه الواعيه مبتعملش كده انا عندى بنات وقالو مش هنعمل نيش ايه لازمته ماهو عندك ياماما عمرنا مشوفناكى فتحاه غير لما حد ينجح ويجلنا ضيوف تقال قوى كمان فى المقابل واحده ريفيه بسيطه جدا جارتى بشترى منها لبن فلاحى تقوالى ليه ياابله دنا جايبه لبنتى ٩٠فوطه للوش ومستشوياهم وانا بقولها ١٢كويسين وبدليل معظم الغريمات ناس بسبطه من احياء شعبيه بيعيرو بعض اما الاوساط الارقى شويه محدش يعرف حاجه عن حد

    المجتمعات الريفية اصعب من الحضر لانهم عارفين بعض كويس جدا وبيعايرو بعض دا حقيقى مالهومش دعوة بالشباب وازاى يبدا حياته المهم الشكل قدام الناس واكتر من كده فى الدقهلية نفس الشى حتى القائمة بتاع العفش بقت تنزل جاهزة مطبوعة بالكمبيوتر دليل على ان الكل بيجيب نفس الحاجة مالهومش دعوة غنى او فقير

    هما ببيجوزوا بنتهم ولا أخوات العريس البنات حتجبلهم الجهاز بتاعهم معاها عشان ميغيروش منها و بعدين هي حتفتح محل لجهاز العرائس وتقف تبيع الحاجه دي فيه ولا ايه وبعدين كله كوم وخمسه وثلاثين بطانيه دي كوم تاني لوحده

    خلاصة الموضوع ان اهل العريس مابتقبلش اقل من كدا وهما بردوا اللى بيعايرو العروسه طب حضرتك مين اللى دافع المهر ومين اللى اتقدم وخطب العروسه ولا العريس منهم لله

    ,في ناس كده وفي اكتر و في كل مكان .. بس مش كل الناس كده والا مكنش في حد اتجوز .. اللي بيتقال حاجه واللي بييجي في الحقيقه حاجه تانيه ... هما لو معاهم الفلوس دي مكنوش قعدوا في كرداسه اصلا :D

    انا لوعندي بنت ومافيش عرسان الا بتوع كردس او ما شبه والله اقعدها من غير جواز ليه يعني هو افتره هي ام العريس قعده تعلف في ابنها عشان يجب لها اللي تجهزهم وتصرف عليه ان شاءالله عن ابوه متجوز لكن الكلام ده علي هواه اهل العروسه وهي تقدر تجيب هم حرين

    ده فى كمان ناس من عادتهم بعد م يجوز بنتو كمان لازم بيوديلها حجات معينه أهل العريس إللى بيحددوها ف المواسم 9 مواسم كل موسم ليه طلبات معينه ومش قليله ولا رخيصه يعنى الاب بيفضل يصرف على بنتو حتى بعد متتجوز هى وأهل جوزها

    اقسم بالله العلي العظيم انا يوم ما اتجوزت مجبتش غير طقم حلل واحد الومنيوم كان 7 حلل وطقم صواني الومنيوم وكان جايلي هديه طقم حلل استانلس 4 حلل ومقلايه وجبت 2 كنكه بالعدد وكان عندي هدايا كام طقم علب بلاستيك وجبت مقلايه واحده تيفال بس وفالاجهزة هو بوتجاز صغير وتلاجه صغيره وتليفزيون صغير وسخان وشفاط فقط لا غير وبعد الجواز جبت مروحه صغيره واخدت كاتيل صغير من امي وجبت طقم اركوبال للمطبخ تقريبا ٢٧ قطعه واشتريت ٦ اطباق قرداني وكان عندي هدايا طقمين خشاف اركوبال واخدت من امي طقمين كاسات وكان عمدي هديه طقم كوبايات وجبت معالق فرداني من كل مقاس 6 وكام سكينه الواحده ب٢ونص والنيش حطيت فيه هدايا قديمه كانت جايالي واللي جالي بعد الجواز ولا جبت طقم صيني ولا الحاجات العجيبه دي خالص والسجاد هما كام حته كدا ع قد المكان وخلاص والملابات تقريبا 4 اطقم وهو طقم مفارش واحد لكل اوضه وبطانيتين ولحافين لكل سرير وزي الفل الحمد لله يارب

    الكلام ده كذب انا من فيصل وكرداسة دى جمبنا وفيها الف بنت عادى بتخش بربع الكلام ده وع فكرة مش ملزم ولا حاجه ده هو بس ال حابب بخش سباق الفشخرة اتقوا الله وقليلو يتقي الله ال حجات ال عابز يجبها دى تجوز عروستين تلاته ف عرايس مبتلاقيش جلابيتين تتجوز بيهم بدل الفشخرة الكدابة يعمل ل اخرته وطز للناس وبدل ميجيب كل ده لينته يجيبه ويقسمه ع بنات تانية مش لاقيه الجهاز ... احنا لازم نبطل داء الفشخرة والجهل ومفيش دين ف الدنيا بيقول كده !؟؟ الكلام ده كذب والراجل ده عايز يتفشخر مش اكتر وحتى لو حقيقي يجيب ال يقدر عليه وتولع الناس ولو خطيبها راجل وشاربها مش هيفكر ف الكلام ده ولو مش راجل ففي الارجل منه ولاحسن تسيبه !؟ انا من فيصل وكرداسة قريبة جدا مننا واعرف ناس كتير منها

    علي فكره ممكن تتجوز في اوضه فوق السطح ممكن تعيش معك في الاوضه ديه علي ترابيزه و كرسين و تلاجه و بوتاجاز و مروحه علي فكره ممكن تعيش معك العمر كله ولو فكرت انك اتغيرت وخلاص مفيش عيشه مع بعض مش هاتجرجرك علي المحاكم علي فكره لو كملتوا مع بعض و ربنا كرمك ورزقك باولاد هتلاقيهم في احسن صحه عشان هي عارفه الاكل الصحي و هاتخاف عليهم اكتر من نفسها  كل حاجه عارف انها بتكون نصيب لكن الجواز في البلد ديه ميفتحش بيت لو انت نأويت هتلاقي طلبات بسيطه جدآ للاجنبيه  ممكن تكون طلبات تسمعها تضحك بس هي عايشه عيشه أهلها اللي عندنا هتقولك انت امك مصريه و ازي تتكلم علي الست المصريه كده ديه هي اللي ربتك و وقفتك علي رجليك جواب السؤال ده  هي كلمه واحده امي ربتني احسن تربيه و شايفه ان مستقبلي مع اللي احسن من اي بنت مصريه شايفه نفسها وربنا اختار لي ان ده يكون سبب و اتجوز واحده اجنبيه خليكي انتي في النيش و الحلل و طقم السكاكين و 100ملايه بتاعتك انتي و امك  اصل امك يا بنتي عنيها فارغه عشان لو مجبتش طقم الحلل و الاطباق والشبكه ام50او100الف عشان تغيظ بيهم بنت عمك او خالك  روحي دوري انتي و امك علي اللي معه و ياريت ياخد ضمان عليكي من اهلك انك تعرفي تعيشي معه

    فعلا الكلام ده موجود بالاضافه للمطبخ نفسه واكتر.. المشكله ان الناس بتتفشخر علي بعض بالكلتم ده..وينسوا ان الجواز اساسه الرحمه والموده.. بس عادات.. شخصيا اخواتي الاتنين اتجهزوا كده.. والثالثه بنجهز ليها كده برده.. بس في المقابل العريس بيفرش شقه ٥ غرف مع النجف والبراقع والتنجيد... والله المستعان

    والله حرام الطلبات دى ايه السفه ده ربنا هيحاسبهم على السفه ده وبيقولوا اننا عالم ثالث طبعا معاهم حق طالما فى عقليات لسه بتفكر بالشكل ده نا س بتحافظ على عادات وتقاليد بشرية أكثر من محافظتها على الأوامر الإلهية وربنا هو المستعان

    بس للاسف من عادات الارياف الرخمة اوي جهاز العروسة يبقي بالشكل ده ولازم تجيب زي الناس لان كله عارف بعضه وبيبصو لبعضوكل واحدة فاضية معاها فلوس وتخترع حاجة تجيبها لبنتها لازم تتطبق علي كل اللي بعدها ربنا يهدي ويبطلو العادة دي مع الغلاء اللي البلد فيه  ويرزق الراجل ده وكل الناس يارب

    فعلا والله تبذير اوفر...الخضار للي هيتجاب ده اكتر من نصه هيبوظ..احنا عيله مكونة من 8 اشخاص بنستعمل كاتيل واحدة بقالها سنة ونص..كميه الحلل رهيبه هو طقم واحد كفايا وتستنضف ..النيش اختراع غبي ومحدش جابه في الوقت ده غير انه ندم..ده غير انه للاسف بعد اسبوع من الرص بيدشدش بسبب ان الحمل كبير عليه..العريس والعروسة انا متاكده انهم مبيحبوش الخشاف..في اول الحياه هو بوتاجاز واحد و 4 عيون كفايا..لان اكبر حله هتدبدأ تستخدمها لما يبقي عندها 4 عيال..العروسة هتمانع تحط سجاد في الحمام عشان هيتبل ويكمكم بس طبعا مينفعش تتنازل عن الطقمين..هو في حد لسة بيجيب دباديب؟! 40 فوطة ليه ؟ هتاكلهم العته بعد سنه ومش هيستخدمو غير 5 بس ..المكوة البخار بتكوي والله زي العادبة وبمكن احسن بس تجيبها تيفال..2 غساله؟؟مش هتكلم...شواية ايه حضرتك الي هتستخدميها حرفيت مرة في السنة ويمكن لا..35 ملايه؟؟ والله هتاكلهم العته والله. مفيش حد جاب مفرش السرير الستان غير لما يستعمل مرة واحدة ويتركن تحت السرير..وبعد 15 سنه بيشحتوه
    ومش هتكلم عن كمية الاطباق الرهيبه دي لانك لو كسرتي كل يوم طبق هيكفوكي 5 سنين
    "إن المبذرين كانو اخوان الشياطين وكان الشيطان لربه كفورا"

    العادة دي قذرة جدا في القري للاسف بسبب العادات والتقاليد والموضوع مش هينتهي غير لما حد يتنازل فعلا وميهمهوش كلام الناس وواحدة واحدة كل واحدة تيجي تتجوز تتنازل عن حاجه وفعلا يجيبو الحاجات الطبيعية.

    ماهى محتويات قائمة المنقولات الزوجية فى كرداسة ؟
    ماهى محتويات قائمة المنقولات الزوجية فى كرداسة ؟



    لا ياجماعه اناعايشه في بلد فلاحين بردوه وفيها تقريبا نفس النظام وللاسف الاب ممكن يعيش مديون علشان الجهاز ده لا والاده من كده ان العروسه موش بتستعمل ربعهم والباقي العريس يبيعه هو ودهبها ويشترو ارض او بيت بالفلوس دي ده ويعيشو الفقر خلق الله لحد ما يستقرو ودى دماغهم

    ده اسمه يستاهلوا يتحبسوا ويعنسوا ويستاهلوا كل إللى يجرالهم لما الست بتقولك لسة بتتعاير بيهم للوقتى وله عين هو واهله يعايرها فى حين هو بشرع ربنا ملزم ياخدها من بيت اهلها من غير حتى شنطة هدومها وجرى العرف عشان التيسير عليه أن أهل العروسة يشيلوا عنه شوية ويبقى كتر خيرهم لا البيه وبقية البهوات اعتبره حق مكتسب فالموضوع ده هيستمر وهيفضلوا كدة وفى رأيى لا يستحقوا حتى ذرة تعاطف مع وضعهم خليهم يشتروا كل البلاوى دى ويتحبسوا باقساطها ومايلاقوش حاجة يطبخوها فى كمية الحلل إللى جايبينها دى

    ده اسمه افترا وانا ادعم من يغير هذه العادات السيئه بس نسيتوا العشاء الكبير اللي أبو العروسه بيبعته لبنته بعد الجواز بشهر غير الأكل المستوي يوميا لمدة اسبوع وبعد كده حاجه كل عيد ده خراب بيوت والله وأول مولود يعني الأب يفضل يصرف علي بنته طول عمره

    من جاءكم من ترضون دينه وخلقه بصراحة انا في الخليج بشوف الحوزات زي الاسلام ما قال العريس يدفع المهر مثلا عشرة الاف ريال طبعا اضربوهم في 48 جنيه سعر الريال العماني تاخد العروسة المهر تشتري دهب وهدوم وخمس فوط كبار وزيهم ملاية للسرير 
    وبس 
    وهو يفرش اوضة في بيت الاهل غرفة نوم بسجادها بفرشها بكله 
    ويتجوزوا ويجيلوا عيال والعيال تنام علي الارض جنب السرير والحياة فل اوي 
    وبعد عشر سنين ياخد قرض ويبني بيت

    لو الناس تجيب الحاجه الي فعلان هتستعملها كانوا ارتاحوا بس يعملوا ايه البنت لو مجبتش كل حاجه حتي لو مش هتستعملها ولا تعرف اصحابها والعيله هيعيروها والله الحاجه بتفضل في النيش لحد ما ولدهم يتجوزوا والضيوف هما الي بيتمتعوا بالاكل فيها احنا عالم بنفتري علي نفسنا وفي الاخر نقول مش لاقين ارحموا بعض شويه خلوا الدنيا تمشي والشباب والبنات تتجوز ويعمروا بدل ما بيطلع عين اهلهم في الجهاز وفي الاخر يعالم اتقوا الله

    وبيستلفوا ويبقوا غارمات بعد كده عشان عادات وثقافات متخلفة انا عندي نفس الفكرة مع الست اللي بتنظفلي رايحه تجيب تلفزيونكام بوصة LG , ومش عارفه ايه ولما قعدت اتكلمت معها أن ده غلط وأنها حتودي نفسها في داهيه عشان الأقساط وان كلنا اتجوزنا بحاجات ناقصة بس بردوا الموضوع ثقافة وعادات ومورثات صعب التغيير فيها لكن فعلا نفسي نطلع فكره ازاي نغير في الثقافة دي

    ده انا دكتوره قد.الدنيا و متجوزه بأقل من ربع الحاجات دي يا بشر و مش محتاجه حاجه الحمد لله ده كده دي تفتح محل تجاوز ست سبع عرايس معاها اهي الافترا ده ربنا هيحاسبهم علي التبذير ده جداااا حرام شرعااااا و ثانيا العريس هوه اللي ملزم بالجهاز بقا ده شرع ربنا و كتر خير اهالينا انها بتشيل الليله معاهم يعني بيجول ياخدونا بعزنا و جمالنا و يتمتعوا بحياتهم معانا و نبقا ليهم السند و الام و الاخت و الزوجه و نجيب عيال و نشيل الهم و نربي و عمرنا يقصر و كمان نجيب الهري ده كله ليه يعني في شرع مين ده لا تتجوز من بره الخريه دي احسنلها و تكمل تعليمها و تبقا حاجه ليها قيمه مش خدامه و كمان بتبيع نفسها بالرخيص مع احترامي اي حد هيتجوزها من بره مش هيكلفهم ربع الكلام ده عالم جهله

    طلبات مبالغ فيها حتى من اللى كاتباها بس احنا شعب بنحب نزود ع نفسنا معلش انا اعرف ناس كده كتير وايه فرق الديسبنسر عن مبرد الميه ولا عشان نكتر ف الطلبات وخلاص واللى بيجيبوا كده ولا عمر الصينى ب ٧٠٠٠ ولا غيره بتبقى حاجات اقل

    دا كان ايام اهل العز والناس اللي عندهم أرض بالنسبه لطلبات الاكل .. وعندهم محصول يبعتو منه لاهل العريس اللي كان وقتها بيت كبير مفتوح مليان بعيله كبيره وجد وجده .. انما دلوقتي البيت علي قد كام فرد.. للأسف بياخدو عادات وتقاليد ويبطلو يفكرو.. العالم بيتطور واحنا لسه مخنا واقف عند هذا ما وجدنا عليه آبائنا

    ده العادي جدا عند الفلاحين اساسا ده غير المواسم بقي اللي ابو العروسه بيدبح فيها خروف ولا جدي عشان يكفي بناته المتجوزين لحمه و الا هايتفضحوا و يتجرسوا فالبلد كلها 
    و النقوط اللي فيه عرايس بتطلق عشانه اصلا 
    و فالاخر بعد كل ده مع اول خناقه العروسه بتغضب عند بيت اهلها و اهل العريس بيحتلوا الشقه و يسرقوا حاجاتها او يقطعولها هدومها او لو امه قادره بتجوزه واحده تانيه علي عفش اللي غضبانه دي 
    حياه الفلاحين كلها تخلف و غباء و بلاوي ماتتصدقش اصلا لو اتعملت افلام و مسلسلات

    والله الموضوع دة فعلا بيضايقنى وفعلا كل الفلاحين غير المتعلمين أو إللى هم مستوياتهم بسيطة بيعملوا كدة يعنى تلاقى فى قرية معينة ناس بتشتغل بالأجر وبتجيب لبناتها كدة مع ان فى نفس القرية الناس المتعلمة إللى ممكن يكون معاهم فلوس مابيعملوش الهبل دة للاسف دة نقص عند الناس إللى حالها متواضع بيعوضوه بالزيادة فى المشتريات دليل على التخلف طبعا وبجد نفسى المجتمع يقف وقفة حقيقية أمام هذا التخلف إللى بيخرب المجتمع كله حتى وهم بعيد عننا
    وعارفين كمان دة فيه ناس حالها يصعب على الكافر ولازم يضحوا فى العيد الكبير عشان محدش ياكل وشهم

    التخلف ده مش فى كرداسه بس دا فى كل حته فى مصر الا القليل .. وابو العروسه يتسجن عادى مافيش مشكله علشان كلام حماتها والناس .. وتلاقى العريس فى الاخر اللى هو المفروض يفرش بيته بالكامل على أد ظروفه قاعد بيتنك وبيتأمر وبيطلب وهو مايساويش بصله .

    حرام والله ال بيحصل ده فيها ايه لما يتنازلو عن حاجات ويبدأ حياتهم بحاجات بسيطة الكل ده بيروح وملهوش لازمة لما الأم والأب الطرفين العريس والعروسة حصله حاجة يوم الدخلة موت ليه بنعمل في بعض. كدا وبعدين 
    المعايرة ده حاجة هابلة اوى على ايه يعني كل بيروح وبيوظ والزوج بيصلح والحياة بتعدي

    ده قمة فى الغباء والتعجيز والسفه دى ناس أغنى منهم الف مرة وشغاله فى البترول والموانى ولا البنوك واصحاب عمارات وبتسكن ف. شقق وبيوت تمليك ولا تشترى أشياء مكررة بتجيب مطبخ مساحته قد أيه ويكلف كم علشان يستوعب كم الحلل دى فقراء وبيعملوا فى البيوت ويبقى مطلوب منها ده كله الحمد لله أنهم مابيسرقوا

    السبب الرئيسي في الكلام دة الستات ... بالذات في الارياف لما الرجاله اتغربت سابوا قرار الجواز بنسبه كبيره في ايد الستات وكل واحدة بتجهز بنتها تشوف جارتها جابت ايه لبنتها وتزود عنها علشان تعايرها لغايه لما الوضع وصل للمهزله دى

    حضرتك البوابين عندنا بيجيبوا شبكه ب ٦٠ و ٧٠ الف لبناتهم وهم عارفين وواثقين عادي جدااا انها بتبعها اول ماتجوز عشان تساعد جوزها بفلوسها! والراجل لما يجي يجوز لازم اخواته يساعدوة بالافات مهوله وبتتردله لما ولاده الي لسه في المدرسه يكبروا ويجوزوا ويتصرف بأه لاقي ياكل مش لاقي يتصرف لازم يدي لاخوة ازاي!!

    انا من كرداسه وفي حاجات اكتر من كده بتتجاب كمان ولازم بعد الجواز ام العروسه تفضل شهر تيجبلها اكل كل يوم وعشا كبير لحماتها في يوم دا اساسي وبيتكون من جميع انواع الخضار والرز والمكرونه و6 اجواز بط وفراخ وهكذا ولو اهل العروسه معملوش كل دا ومجبوش جهاز كتير وغالي كده الناس تتريق عليهم ويقولولهم انتوا مش مشرفين بنتكوا ونسيت حاجه في كرداسه بيجيبوا 3 عدة شاي وبيجيبوا ملايات وبطاطين ولحاف للاطفال اللي لسه مجتش وحماتها مش بتاخد بوتجاز وبس وكمان طقم ملامين وطقم الحلل الفلاحي وكام طقم كوبايات وكام دسة معالق وشوك وانبوبه للبوتجاز وبلاستك وبعد ماتدخل العروسه بتنزل لحماتها في الصباحه طقم ملايات وبتنزل لسلفتها ولاخت العريس طقم ملايات عندنا بدع في كرداسه والغلبان امابيشوفهم بيجيبو كده بيزنق نفسه ويشتغل بدل الشغله اتنين عشان بنته تبقي زيها زي اي عروسه حسبي الله ونعم الوكيل

    كل كلمة قالتها صح انا قعدت مع صحابي من منطقة شبه كدة وسمعت اكتر من كدة فى الاول اتعصبت و اتضيقت اللى هو ازاى دة اللى فى بوست دة ولا حاجة دة فى ناس يوم صباحية لازم تدبح عجل واهلين غلابة جدا و بيتدينوا بس العيب عليهم ما عن اهلها ما اتجوزت و تعنس عادى دة انت بتمن الحاجات دي كلها امن مستقبلها كدة كدة هتطلق

    احنا عندنا بنجيب كل الكلام ده وفوقهم مراوح للشقة وهدايا لام العريس واخواته لازم ياخدو من جهازك يوم الصباحية بس الاكل ال بيروح بيبقي عبارة عن قفص فراخ فيه 10فراخ والخضار بالقفص مش بالكيلو يعني قفص طمامطم وزيه بطاطس وزيه بصل وهكذا و2شيكارة دقيق واي خضار وفاكهة موجودين ف السوق والغسالات وحدة اتوماتيك وواحدة نص اتوماتيك وواحدة عادية كمان وف الاخر يطلع واحد يستظرف ويقول الراجل بيدفع ربع مليون ف الشقه والعروسه بتصلي ركعتين استخارة وشكرا

    هما دول اللى بيبقوا الغارمات و يخشوا السجن و بعدين يقولوا للناس اتبرعوا و يطلعوا من السجن ده اسمه جنان عنها ما اتجوزت من كرداسه ما كل واحد يمشى على قد اللى ربنا مديهوله و شويه شويه يجيبوا كل حاجه بدل السفهه ده كل الطبقه دى بقى نظامها كده دول اللى مخليين الدنيا عمرها ما هتتقدم

    الكلام ده مش كتير مقارنة ياللي بيحصل في الفلاحين و القرى الأفقر .... انت ماجبتش سيرة حاجات كتير صدقني زي الفوط و المخدات و المراتب و الرسيفر و الكاسيت الاستريو و حاجات اقسم بالله تحزن ... الأهل بيعيشوا حياة كاملة علشان يحوشوا مصاريف جواز عيالهم ....

    على فكره كل ده فعلا بيجى وحاجات تانى الراجل نسى يكتبها هى للاسف عادات سئية ولازم نتخلص منها بس هتلاقى الام تقولك انا مش عايزه بنتى تتجوز وتكون ناقصها حاجه وهى جايبه لها حاجات تكفى عروستين تلاتة وبالمناسبه النيش ده والله ماحد بيقرب ياخد منه كوبايه ولا كاس يلا ربنا يهدى انفسنا

    نفس الكلام ده في الصعيد و ضيفي كمان انهم في الخطوبة بيعملوا حاجة اسمها رد شبكة يعني العريس يجيب شبكة للعروسة و تاني يوم اهل العروسة يجيبوا بتمن الدهب ده اكل لاهل العريس و هدية لامه و بتكون تلاجة او تكييف علي حسب اللي ام العريس تطلبوا والله ده افتري وهبل مش حاجة اكتر من كده ولما دخلت في نقاش مع واحدة قبل كده قالتلي انا اهلي بيعملولي قيمة هو لازم عشان العروسة تبقي ليها قيمة تجيب بثمن شبكتها اكل و شرب يبقي اخرتوا المجاري لامؤاخذة 

    دا اسمه قلة تقدير ..ان البنت بتتقدر باللى أهلها جيبينوا.. وللأسف ف ناس متعلمة وبرده بتعمل كدا لانها مفروض عليها بس اللى مستغربة منه ان ف ناس مش مصدقة الكلام دا  الكلام دا بيحصل كل يوم دا فى ناس فعلا بتبقى القاعة اتحجزت والفستان موجود وف يوم واحد اللى القيمة هتتمضى فيه العريس بكل سهولة ممكن يتنازل عن العروسة. البلد دى محدش فيها بيرحم وكله بيعوض نقص الحرمان ف التانى وبالنسبة للمتعجبين من الموضوع الناس دى مش بتاكل علشان يجوزوا بناتهم دول وبالنسبة للعادات دى متخيلينها الحيطة المايلة اللى بيتسندوا عليها وف الأول والاخر نرجع ندور ع الأسباب اللى وصلت للدرجة دى يمكن نلاقى حل .. وطبعا من ضمن الأسباب البعد الدينى ،التقليد الاعمى وغيره .. والله المستعان

    والله ياجماعة الموضوع دة عندنا فى الشرقية والغريب انة فى القرى الصغيرة عادى ولازم وال ميعملش كدة ل بنتة يتعاير والجوازة تتفشكل بس الحمدلله فى مدينة الزقازيق غير كدة انا الست بتاعت الجبنة عملت كدة واكتر دى باعت قراط ارض عشان تجوز بنتها ال لسة طالعة من تالتة اعدادى وقلت لها دة حرام بنتك لسة صغيرة والتكاليف دى كلها عشان لسة ناس بتبتدى حيتها؟قالت مينفعش غير كدة دى الاهل والجيران بتقعد ساعة فرش العفش وتعاير وتتريق على بعض

    ايييييه كل ده ، طب و هي لو عرفت انها بتتجوز من غير ولا مليم و ان جوزها المفروض اللي بيجيب كل ده هتعمل ايه ؟؟ المشكلة دلوقتي تيجي تسأل اي حد يقلك الدين بتاعنا فرض على البنت تدفع برضو اما تتجوز و تجيب النيش و الحجات اللي ملهاش أي لازمة ، المشكلة اني مشفتش ده غير في مصر اللي هو الطرفين بيجيبو الحجات بس و العروسة مش مجبرة على حاجة و في الاخر تيجي حماتها تتشرط و في جوازات بتبوظ ، لو عرفت الحقيقة مكانتش هتتشرط كده! بعدها الغالبية العظمى من الحجات اللي طالبينها ملهاش لازمة اساسا و مش هتستخدم هتبقى مركونة عالرف لغاية متتعفن ! اعقلوها شوية حرام عليكو ، ده حتى ربنا مش بيحب المبذرين "اللي بيصرفو كتير على حجات ملهاش لازمة" و بعدين ايه يجيبو لحماتها كمان ! هي حماتها عايزة تعيش حياتها و تنظف على حساب الغلابة !

    اسمه إسراف ومش من الدين ولايكلف الله نفسا إلا وسعها الناس بتعبد بعضها عشان كلام الناس ابيع أرض واستلف واموت نفسي وفي الاخر تتجوز وينكد عليها وتتنازل له عن كل شي مقابل بس يطلقها وترجع لاابوها مطلقه ومعاها أطفال اما تتزوج تاني ويجيب كل ده تاني أو تكون عبء على ابوها طول العمر الرسول قال اقلهن مهرا اكثرهن بركه اتقوا الله وملكوش دعوه بكلام الناس وهات الضروري والمطلوب فقط وبلاش حماتها نجهزها احنا ليه ابنها يجهز أمه عجايب

    طيب ممكن تقوليلو هتجوزها انا و متنازل عن عن الالف جنية ورد علشان بيجبلي حساسية و الحصير و القرص علشان مش طالع القرافة و البوتجاز التاني علشان ولدتي الله يرحمها ... و بعدين خمسة كيلو خيار لية ؟؟؟ هما بستخدموة في اية بالظبط ؟؟؟؟

    يعنى لو حماتها لها 5 اولاد صبيان كل واحد يتجوز عروسته تجيب لها بوتاجاز طيب هتودى البوتاجازات دى كلها فين وإيه كمية الملايات دى كله مبالغ فيه
    عموما ده اسمه استهبال واستغلال والحاجات مبالغ فيها المفروض العروسة مبتجهزش اى شيئ لكن للظروف الاقتصاديه اللى احنا فيها أبو العروسة بيساعد العريس لاقامة بيت وايه الاجهزة دى كلها ولو ما اشترتش الميكرويف مش هتاكل وإيه كمية الأكل دى هى هتتجوز ولا هتعمل الفرح فى بيتها ... ده حرام والله ياريت الكل يتفق زى زمان سواء العريس او العروسة يتجوزوا بالضرورى اللى يقوم البيت فقط لا غير

    عندنا نفس الكلام بس الناس بدات تفوق شويه من الغلاء معدتش حد بيبص للدرجه دي بس بعض الناس لسه عندها جهل وبدل حوار هدايا بيت العريس في خاتم لام العريس بيعدي ٥٠٠٠ جنيه ولو معجبهاش بيرجع وليلة زرقاء وي حاجه تتخيلها في الشقة اضربها في اتنين والمضاعفات

    مفروض التعاون بين الأهلين والزوجين ويجيبوا المهم ثم الأهم ثم الأقل أهميه ونبدأ بالضروري جدا أولا والرحمه حلوه من الطرفين //المشكله كل واحد منهم فاكرين كل ما يجيب أكثر يبقي شاري ءكثر وكل ما يغرم كثير ميفكروش يسيبوا بعض هما لسه اتهنوا بالحاجات ولا الفلوس ال دفعوها بردت /فيعيشو مع بعض والخلافات تشتغل او يسيبوا بعض ويخصرو ال دفعوه //المشكله الاكبر والتخلف ولو تنازل طرف عن بعض او معظم الأشياء في الأول بيبقوا طايرين ببعض وبعد الجواز يعايرو بعض انت جبت وانت مجبتيش ده انا متزوج ببلاش ويضحك ويفكر في زواجه ثانيه مهيزواجه و حاجه ببلاش كده //عجائب الدنيا

    انا في الاول افتكرتهم حييفتحوا محل اجهزة كهربائية. ..وفي النص افتكرت انهم علي مشروع محل بقالة ...وبعدين قلت لنفسي الموضوع اكبر من البقالة شكلهم داخلين علي فرانشيز ل مترو ماركت مثلا وبعدين بقدرة قادر الموضوع اتحول لفرع مطعم ام حسن ...انه لشيء عجاب هما ناويين علي انه بزنس بالظبط ؟ ؟

    لي أقارب في الريف وعملت في قرية تابعة للجيزة قرابة 25 عاما واقتربت من أهلها جدا ....الأسرة تحمل ما لا طاقة لأي أحد به لتزوج بنت واحدة فما بالنا لو هناك أكثر من بنت .....هذه مسئولية مجتمع بكل أطيافه. ...والعبء الأكبر يقع علي عاتق مشايخنا وعلمائنا الأجلاء 
    الرسول صلي الله عليه وسلم زوج فاطمة قرة عينه لسيدنا علي بأقل القليل وقال لأحدهم :إلتمس ولو خاتما من حديد وزوج الأخر بما يحفظ من كتاب الله ....طول ما احنا واخدين الدين مصحف في سيارة وجمعة نصليها علي عجل وشهر نصومه نأكل فيه ما يكفي للعام كله فلا فائدة

    و انتو شفقانين علي الاهالي جامد كدا ليه مهما اللي حاطين القوانين الغبية دي و متمسكين بيها و اللي بعدهم هيورثوها و هيتمسكو بيها بالرغم من انها ممكن تكون مش عجباهم و هنفضل ماشيين ورا كلام الناس و المعايرة اللي هو انا عملت غلط يبقي و ديني لانتا كمان عامل نفس الغلط و الا هعايرك و اتكلم عليك،طول ما مفيش حد هياخد الخطوة و يغير فعمر التغيير ما هيجي لوحده و خلينا نلف فساقية كلام الناس و المعايرة زي التيران اللي مغميين عنيها و نازلين طحن فيها و هي مبتعترضش بس الفرق ان دول بهايم ملهمش حرية الاختيار

    ولما العروسة بتجيب كل ده ويبقى عندها كل ده ..تتنيل على عين اهلها وتتجوز ليه ...دي تعمل مشروع هي اهلها بال 300 الف دول وببقوا ملوك زمانهم ..دي تتعلم بيهم فب الجامعه الامربكيه ...ربنا يهدي الناس وينور بصيرتهم من التخلف والتبذير والاسراف ده..وعلى فكرة الناس الهاي كلاس واللي معاهم فلوس مش بيعملوا كل ده وبتلاقي بيوتهم بسيطه ...مش فاتحين شركة رنين في شققهم ولا فرع جديد لأسواق شارع عبد العزيز في بيوتهم .

    فى الارياف كمان اكتر من كدا لان العروسه بتعمل المطبخ سواء خشب او المونتال وكمان الستاير والنجف وبعدين بيودوا طيور صاحيه حوالى 10 بطات وكمان 6 اجواز حمام وكمان شيكاره كبيره رز وكمان شيكارة دقيق كبيره و10 فراخ بلدى و2 ديك رومى دا بقى غير كميات كبيره جدا من الكرنب والبتنجان والسمك وطشت مليان لحمه وواحد تانى فيه كفتة رز دا غير ان الحاجات اللى فوق دى نقصه كتيييير جدا زى المكنسه والفرن الغاز والشعله وغيييييره كتير

    سؤال هو اللي جاي يتزوج بنتك ده هيتزوجها هي ولا الحاجات دي إذا كان فعلاً راجل محترم كل هذا الكلام لايعنية ويمكن أن يتزوج بالاشياء الضرورية انا تزوجت من25سنة وزوجتي أحضرت البوتاجاز بتاع المصنع الحربي وغسالة برميل وبعد ذلك ربنا فتح علينا وجبت كل حاجة ناقصة البيت والحمدلله طز في الناس تفهم ذلك أو لا تفهم وبعدين هي كرداسة كلها هتتزوج بنتك

    والله حاجه تحزن بس الكلام ده بيحصل فعلا ف قرى كتير انا حضرت اكتر من جهاز عروسه فى قريتى وكنت مزهوله من كترت الجهاز لا وكمان كنت بفرش معاهم لدرجه مكناش لقين اماكن نحط فيها الحاجه بقينا نحط الحاجه ف كراتينها تحت السرير والله الكلام ده حصل وبيحصل والبنات مش بتتنازل يعنى كان فيه منهم بنت ابوها قال لها نجيب المعقول يعنى من كل حاجه طقم او اتنين ويعطيها الباقى فلوس مرضيتش ده عشان كان معاه يعنى بس والله فيه ناس مفيش معاها وبردو بتجيب قسط وماادراك مالقسط طبعا ضعف وتفضل تسدد طول عمرها بقه فعلا حاجه تحزن ومحتاجه تدخل

    فعلا الفلاحين عندهم عادات فى الجواز منيلة بنيلة ومبالغات رهيبة والله قابلت واحدة فى المعرض والله افتكرتها ياعينى جاية تشترى حاجات وتبيعها وبتنتهز فرضة المعرض لان شكلها يقطع القلب هى والمعاها فبتتكلم مع قرايبها وتقولهم ناقص لى الحاجات الحتوزعهم على قرايب العريس روحت سألها قالت لى انها بتجهز بنتها وانها عندها خمس بنات والبنت بتقف عليهم هناك فى الجهاز يجى 100 الف مش متذكرة والله قالت لى 100 ولا 200 و حنعمل ايه علذان ماتتعايرش وتبقى اقل من الناس الهناك قلت لها ناس مين ايه الكرب ده

    هما ممكن بيكبرو الطلبات شويه عشان تساعديهم او تشوفي حد بساعدهم لان طلباتهم مش عقلانيه خالص اكيد بنتهم 20سنه دي تعليمها علي قدها هتعرف تتعامل مع الميكرويف والخلاط الكامل ده وكمان مكواه بخار اللي انا نفسي اجبها ومستغلياها عشان2000جنيه وليه شوايه بالكهربا وليه كاتل وايه كمان دسبنسر وليه كميه الحلل النوفال والتيفال والسيرامين والبورسلين والالومنيوم والاستانلس هيطبخو فيها ايه 
    والله لو بنت مليونير مهتجيب كل الحاجات دي حسبنا الله ونعم الوكيل في الغباء والجهل والتخلف
    عمرنا مهنتقدم ونتطور ونرتقي طول ما علي الاقل70في الميه من الشعب بيفكر ويتصرف كدا😓😓😓😓😓😓

    النوع ده من الناس بالاضافة الى ماسبق فى التعليقات طبيعتهم كدة 
    هما تفكيرهم فى انة هيطلب الطلبات دى ثم هيشوفوا حد يجبهالهم او مجموعة يساعدهم فى الشراء المهم فى الاخر انهم يحصلوا على كل هذا الكم فى كل جوازة بنت من البنات وهكذا .. واهم حاجة بقى هى التباهى بالمقدرة على ايجاد ممولين لشراء كل ماسبق لكل بنت المقصود انهم بيفكروا و ينظروا للموضىوع بطريقة مختلفة لا علاقة لها باتمام زواج من عدمة 
    اما الغارمين فى بعض هذه المناطق فاحترفوا موضوع حرق الاجهزة لتوفير المال بمعنى بيع الجهاز باقل من تمنه كاش ولكن هوا بيسددة على اقساط ! و ببساطة مابسددتش وهكذا كتكرار مرة بعد مرة لازم فعلا الفكر يتغير

    طب محنا ابوها بيطلب مننا حاجات وبيطلع دين اوبنا برضه زى مثلا ٨٠ جرام دهب احا لى ٨٠ ها لى طب متمشيش دبلة وخاتم ومحبس ع سلسله حلوة ها ولازم شقه ٥ اوض وصاله وحمام ومطبخ ومعرفش اى احا طب متنفعش اوضتين وصاله برضه وحمام ومطبخ لا احا تانى اهى ولازم يبقى فرح مكلف ميتين اهلنا من ٢٠ الف ل ٥٠ ده الفرح بس احسبى انتى بقى وشوفى مين مهرى وطالع كذا ميتين اهلة وخدى الكبيرة بقى واحد زيى ابوه متوفى ووحيد مش هيعرف يهز نفسه يعنى انا عندى ٢٠ سنه وبدرس وبشتغل وبحاول ع قد مقدر عشان بس اشوف مقدم شقه ف منطقه زفت ولو اوضه مش هقدر ع تمنها ده غير الدهب وال معرفش اى واى 

    وليه بوتاجاز ليها ولحماتها واكل ليها ولحماتها وليه اصلا ديسبنسر وليه اساسا العريس يتشرط ما كل واحد يجيب ف حدود المعقول وليه البنت تكلف اهلها كل ده ! افرضى جابو كل ده وطلع راجل مش كويس لا هو ولا اهله هيبقا استفادو ايه يعنى !!! ان بنتهم اخدت لقب متزوجه ؟ عشان متبقاش اسمها عانس ! وايه اللى لو العريس مجابش كمبيوتر هى تجيبه ده كمان عنها ماتجوزت بدل قلة القيمه دى هى مش بيعه وشروه واللى يدفع اكتر يعلمو البنت تعليم محترم وتتجوز من برا واحد يتقى ربنا وتعيش بابسط الامكانيات احسن ما يعملو كل ده وف الاخر لو نقصت كنكه يعايروها 

    روح هات الحاجة كلها بسرعة وخللي مراتك تمضي علي الكمبيالات وبعدها تخش السجن وتطالبوا المجتمع بجمع التبرعات لخروج الغارمات من السجون. لفعل هذا السفة.. والمفاجاة الواد يطلق البت علشان مايشرفهوش ان يناسب واحده امها خريجه سجون

    احنا نستاهل وهوا جاي يعلمنا الأدب واحنا لسه ما اتعلمناش لأن فعلا أنا بشوف ناس فقيرة جدا أصلا و بتشحت من الكل عشان نلاقيها جايبه طقم جيرانيت وهيا أصلا مش هتطبخ الا في الالومنيوم..وميكروويف وحاجات أنا جبتها بعد الجواز أساسا.. :-\ .. بتجهز لميت سنه قدام لها وللاحفاد..وتلاقي العريس مقشف أصلا ومجهز اوضة وصالة وخشب معفن من السوق..والدهب اللي جابه في الصباحية بيبيعولها وياخده منها :-\ .وأمه لسانها طويل وبتطلب من العروسه وهيا عارفه ظروفها كويس وإلا تفضل تعايرها كانه هتجوزها توم كروز. 
    والله قريبتنا فرع فقير في العيله وكلنا هنساعدها أصلا..وام العريس شغاله بتخدم في البيوت وبتقولها فلانه جابت ديب فريزر ادراج :-\ ماما مسكتها مسخرتها وقالتلها ليه ابنك هيملالها الفريزر لحمه.. بطلي استهبال انتي عارفه اننا هنساعدها هتطمعي ولا إيه..ده اللي عندنا احنا مش هنشحت زيك علي عيالنا من الغريب ونجهزهم بالاستعطاف :-D 

    و المفروض ان احنا نساندهم فى مواجهة غلاء المعيشة ....و نساعدهم على ستر بناتهم ......اذا كان احنا فى بيوتنا مفيش كلام فارغ زى كدة .....انا شايف انهم يولوعوا بجاز .......و اللى عاوز يتجوز و على قدة اهلًا و سهلا .....اللى عاوز فشخرة يروح يكتب شيكات على نفسة و يولع بردة .

    على فكره الحاجات الا ذكرت عندنا في الصعيد في سوهاج لازم كمان زيادة شويه منها طقم الانتريه والستائر ولازم المطبخ يركب المنيوم وخاتم ذهب إلى أم العريس وكمان أبو العروسه لازم يدفع في الذهب أقل حاجه 20 ألف ده مع إلا ذكرته في البوست نسيت السفره وحسبنا الله ونعم الوكيل

    مره واحده جت نضفتلى الشقه مره واحده بس جاتلى بعدها باسبوع عايزانى اساعدها فى هذه القائمه الفظيعه وجارتى بتحكيلى انها ساعدت واحده عندهم وجابتلها بوتجاز اربع عيون اكتشفت انها باعتوا وراحت جابت الست عيون

    اللي يغيظ في كم الإفترى في الحاجات اللي بتيجي دي إن العريس في الأخر لما بيتجوز بيبقى معندوش دخل كويس و يوم اه و عشرة لأ شغل و بيبقوا عايشين بالعافية و تبدأ تبيع في حاجات جهازها و أحيانا بكرتونتها بالرخص و الموقف ده اتكرر قدامي كتير

    الكل فاكر ان الدول المتقدمه اتقدمت علشان بيمتلكوا المال لا والله مش موضوع مال موضوع فكر وثقافه واسلوب حياه لو حد دخل اى بيت فى أوروبا هيلاقيه فى منتهى البساطة والشياكه بدون إرهاق مادى ولا تبذير بصراحه لما قريت الطلبات المطلوبه جالى إحباط وفكرت فى موضوع تانى خالص الغارمات عايز وقفه من الدوله ومش تسديد ديونهم هو الحل بالعكس دا بيشجع على الثقافه اللى انا شايفاها قدامى دى

    ثلاث اربع الحاجة مالهاش اي ستين لازمة 
    ده احنا المفروض طبقة متوسطة و ماجبناش غير المهم والي هنستخدمه في احتياجنا وبس و لو احتاجنا حاجة تانية بعد ما اتجوزنا ولاقيناها مهمة بنجيبها غير كدة مالهوش لازمة 
    ليه كل الحلل و الصواني دي والمفارش وليه تجيب بوتاجاز لحماتها هي معندهاش بوتاجاز ان شاء الله وليه هي الي مع ده كله الي تجيب الكمبيوتر و ليه غسالتين ؟ هتغسل ليها وللزمن -_- وليه مليون فوطة و مليون ملاية و مفارش سرير مالهاش لازمة هتتركن ليه كل التخلف و الهبل والاسراف ده ؟ 
    بحقكم عروستين ثلاثة ثانين يقدروا يتجوزوا 

    و زيدي عليهم كمان ان انا اقترحت على احدهن انهم يروحو لمصر الخير بعد كتب الكتاب للمساعده..قالت لي ما ينفعش..ليه يا حاجه؟؟ اصل ما ينفعش الجيران يعرفوا انهم بياخدوا مساعده..و للعلم فيه كتير منهم مكسلين يعملوا بطاقات تموين و باتحايل عليهم و بيرفضوا يشتروا من عربيات الامن الغذائي علشان ال"برستيج"..ااه و الله

    ده عادى جدا عند فقراء الناس اللى بيدعو الفقر ... ومظم الغارمات بيكون السبب جواز البنات وان دخلت السجن ... فهى تعلم وابنتها ان هناك من سيتقدم لفك غرمها واخراجها من السجن ... هؤلاء هم فقراء مصر .. والسبب الأخر للغارمات الذهاب للعمرة ولابد من احضار هدايا بالالاف والا يتم معايرتها ... ناس تفكيرها متخلف وعلى جميع المصريين رفع هذا الغرم عنهم دون تفكير فى اعادة تأهيل التفكير

    الكلام ده حقيقي والراجل ده مش كذاب وانا من كرداسه والخراب ده بيحصل واكتر منه كمان وربنا ينتقم من أصحاب البدع وبنندين وبندمر عادي علشان ولاد التيت اللي كل يوم يطلعوا ببدعه جديده عموما كل واحد ببدء بنفسه ونفوق اللي بيحصل ده من التبذير ومش بنحس لا فرحه ولا بزفت من كتر الغرايم

    انا كنت مترشح عضو مجلس شعب عن دائرة كرداسه و ناهيا فى انتخابات مجلس 2005 و كان عندي إعادة ، فا بالطبيعة أن اكون متواجد فترة طويلة مع الناس و ادخل بيوت كتيره و اتقابلنا مع عائلات ، من طبقات مختلفة. هو فعلا ده بيكون عفش بعض الزيجات و فى بعض الحالات اكتر من كده فى منطقة ناهيا و كرداسه و ابو رواش و بني مجدول، بس ده مع أبناء و بنات كبارت العائلات الثريه بالمنطقه زي الزمر و مكاوي و البطران ، و ايضا لأبناء و بنات و مشايخ العربان بالمنطقه مثل الرابايعه و البراقوه و الغيلان و ابو جاموس ، لكن فى المعتاد الجهاز بيكون اقل بكثير من هذه القائمه ، و إن كان إذا ما تمت مقارنتها مع بنات الحضر و المدن ، ستكون ضعف أو ربما ثلاث مرات تكلفة جهاز بنت المدينة.

    مطلوب شخص قوي يتحدى ويقول مش عامل ده وما حدش يناقشني واللي مش عاجبه يجيب حاجة منها نقوط وحانقبله .... ساعتها بس الأصوات العالية الضعيفة حاتتخرس ... الموضوع طبعا محتاج أكتر من شخص يعمل ده لغاية العادات الجديدة ده ما تنتهي وحصل في بعض القرى ان اللي اخدوا الخطوة ده كانوا من المقتدرين فما حدش يقدر يتكلم

    ايه الهرى ده كله ده واضح انه بوست مضروب ومش منطقى وممكن يكونوا بيستغلوها ولو حقيقى يبقى الناس دى مجانين ليه 6 أطقم حلل ليه الف جنية وليه من كل حاجة 2 وليه أجيب بوتاجاز وبيبسى لحماتى هما كانوا بيطبخوا قبلها؟؟ وليه من كل حاجة ليه الفشخرة الكدابة دى ايه المشكلة لما يجيبوا على قد احتياجهم وقدرتهم الماليه يعنى العريس وأهله مش هيعايروا العروسة لو أهلها دخلوا السجن بس الديون دى كلها قيمة الإنسان الحقيقة فى عقلة واخلاقة لو مش حاسس ومقدر قيمتك ويعايرك خليه يقعد جنب انه احسن ده صنف لا يصلح للزواج ماتسمحوش لعادات أو أفكار أو أشخاص تهينكم وتدمركم نفسيا

    فعلا الكلام دا صحيح بيحصل في كرداسة، وكمان زودي ع كلامك دا ان أهل العروسه بيفضلوا شهر كامل بعد الجواز يودوا اكل لبيت العريس ،فطار وغداء وعشاء، وكل يوم وجبات غير اليوم اللي قابله، ولو مش عملوا كدا البنت تنفضح قدام أهل جوزها🤔


    نعم ايه دا معلش انا متجوزه لسه متجوزه ووضعنا المادي انا وجوزي يعني الي حد ما كويس وماتجوزتش ب ١٠ في الميه من الحجات دي جبنا احتياجاتنا وبس سوري يعني ان شالله معنها اتجوزت لو بالطريقه دي ايه يعني اللي اتجوزو عملو ايه معملتش إنجاز يعني ثم ان دينيا البنت ملهاش تجيب قشايه في البيت احنا بنجيب حاليا بس مساعده عشان وضع البلد وحال الشباب ومحدش أصلا المفروض يساعده في طلبات زي دي بصراحه هو قابل بكدا يشرب بقي يروح يسرق الناس تساعد الغلبان اللي عايز يستر بنته باقل حاجه دا كلام فارغ

    والله انا لو في كرداسة لا اخلي بنتي تكمل تعليم في الجامعه واللي هاصرفه ع الهبل ده هيا اولي بيه وتتجوز من بره ده تخلف اقسم بالله وغير الحاجات الزياده عجبني اوي انها تجيب لحماتها هيا الرجاله بتتجوز دلوقتي عشان العروسه هيا اللي تجيب لامه خرا عليك وع امك

    مع احترامي بس انا اعرف ناس من كرداسه والجهاز عندهم مش اوفر كدا والنوفال دي ماركه مش نوع حلل علي فكره بطلو تهويل بجد مفيش حد ف كرداسه بيعمل كدا والست دي بتضحك عليكو عشان تجيبو الجهاز وتبيع منه

    العالم دي بتضطر تشتري كل الحاجات دي بالقسط وطبعا فوايد اكتر من ثمنها ولما يتعثروا في السداد يدخلوا السجن ويبقوا الغارمات اللي بندفع لهم الزكاه وصندوق تحيا مصر يدفعلهم علشان يخرجوا. منتهي السطحيه بصراحه مننا اننا نعالج ده باننا نديهم المفروض نعلمهم يفكروا ويقاوموا العادات السخيفه الغبيه دي

    ده اسمه طمع وقلة دين وغباء انا عشت 7سنوات فى الأردن لم أر عروسه اشترت فوطه واحده او حتى اشتروا حلويات او ان أهل العروسه عملوا طعام وذهبوا إلى ابنتهم بعد الزواج يعتبروه اهانه لأهل الزوج يعنى يقولوا احنا ماعندنا اكل احنا مش قادرين نطعم بنتك لكن احنا شعب نزعت منه المروءه والشهامه واصبح الرجال اشباه الرجال ..انا عندما تزوجت لم أكلف زوجتى واهلها أى شىء وتزوجنا بأسط الاشياء والحمد لله أصبح عندنا بفضل الله كل شىء ارحموا من فى الارض يرحمكم من فى السماء الزموا القناعه فانها كنز مش موجود عند الفراعنه المصريين

    يا جماعه والله الكلام مضبوط. وللأسف الشديد. مش في كرداسة بس. الكلام ده كله منتشر في الريف ومن زمان مش دلوقتي بس. والإضافة حضرتك نسيتي تضيفي العشا. وهو عباره عن 2 خروف. أو عجل. والله الكلام ده فعلا

    وانا اتفق مع من قال ان الكلام دة كلام حمص ' صحيح بعض الأشياء المتخلفة باسمه عنها من ناس تعمل معى زى غسالة عادية وأصالة اتوماتيك أسأل لية واحدة الأبيض وواحدة الباقى الهدوم ' ثلاجة ودرب فريزر ومايكروسوفت ليه ؟ هالة التسخين على البوتاجاز ' ازضه للأطفال وحلويات للسرير ليه مش لما تخافوا الاول ' حاجة غريبة

    ده إسمه تبذير لا يقبل به أي شريعة سواء يهودية أو نصرانية أو إسلام ،، هذا كله من باب المظهرة والكبرياء ، لو إحنا عندنا إسلام صح هنعرف إن الرسول قال { الدنيا متاع وخير متاعها المرأة الصالحة } وقال { إذا أتاكم من ترضوّن دينه وخلقه فزوّجُوه إلا تفعلوا تكن فتنة في الأرض وفساد كبير } وقال { خير النساء أيسرهن مؤُونه } يعني أقل مهر ... يبقى كل اللي بيعملوه ده إسمه بتناج ولا يمس الإسلام بصِلة

    سيدنا علي ابن ابي طالب تزوج ابنة سيد الخلق السيدة فاطمة رضي الله عنها وكان بيتهم بسيط جدا جدا ومش عيب ان الانسان يعيش علي قد ايده بس يكون الطرفا في منتهي الصراحة وانا اعرف ناس اتجوزت علي مبليا بسيطة ومن غير مطبخ مشاء الله يمتلكون الان عمارة

    في بورسعيد الراجل هو اللي بيجيب كل حاجة تخص المنزل ( الأجهزة و الآثاث ) العروسة بتجيب حاجات المطبخ و المفروشات .. ومع الظروف الاقتصادية ممكن تساعد و تجيب السفرة او الانتريه لكن اللي فوق ده جنان رسمي قال 48 فوطة و 135 ملاية سرير 

    عادات وتقاليد رجعية ومتخلفة دلوقتي الواحد مش قادر يتجوز اصلا عشان يروح يجب الطلبات دي ويجهز ومعلش يعني فين سبع البرومبة الي هيتجوز مش مفروض يجيب هو الحاجات دي ولا هو فالح يتجوز وبس والله الأب او الام احسن حاجة يشلو الفلوس دي لبنتهم تروح تتعلم بيها احسن او تسافر بره الخرارة الي احنا عايشين فيها دي تعمل حاجة نظيفة في حياتها يمكن مصر ساعتها تتغير وتنظف وتتطور

    دا يعتبر ولا حاجة من إللى بيعملوه في بلدنه (برج مغيزل التابعة لمركز مطوبس محافظة كفرالشيخ )وإسالى حضرتك أفجر ناس فى تجهيز العريس والعروسة وحطى بقة فوق ده دهب ب١٥٠ألف جنيه وفرح بربع مليون جنيه دول بقه شئ تانى خالص فجر من اللىمات ابوه

    مش لازم يجوزها من كرداسه ما يجوزها واحد ابن حلال من اي منطقه تانيه ويقوله دي ظروفي ودي امكنياتي وانت كمان يابني هات الي تقدر عليه اهم حاجه تصون بنتي وتكون ليها سند في وقت الشدة بلاش ياجماعه المبالغه في الطلبات ليه بنتقل علي بعض 
    لازم نرجع لدينا شويه زمان ايام النبي صل الله عليه وسلم كان مهر الزوجه حفظ سورة من كتاب الله وفي ستات في دول مسلمه الان في عصرنا ده بتطلب مهرها انه يحفظها القران 
    لازم نكون في رحمه في قلوبنا ونحس بظروف بعض ياريت كل اهل عندهم بنت علي وش جواز يتقي الله في نفسه اولا وفي الي هيبقي سند بنتك من بعدك

    طب م يهجرو الناس من كرداسه لو مشكله مناطق زي العريش كده يفجرهم ويعملهم حداد ع قناه النهار🎉 ويعيشو ف اي مكان مفهوش الطلبات دي وبعدين ما يتعايرو عادي هم بيتعايرو من زملا شحاتين بردو مش هيكونو جابو كل ده ولو جابوه يبقو حراميه ويعايروهم بردو

    انا لي صديقة من كرداسة و بعت لها الكلام دا كوبي. فطست علي روحها من الضحك و قالت لي الكلام دا مابيحصلش و انهم زى اى مكان في الدنيا بيتفقوا علي ان العريس بيشتري حاجات و العروسة بتشتري حاجات و كل واحد و مقدرته مش لسته و مقرر و محدش بيطلب حاجة لحماتة و مغيش حاجات تيجي منها اكتر من واحدة و بعدين هات ياتريقة من عينة ينفع جبنة دومتي بدل عبور لاند و ليه بيبسي مش كوكاكولا و لا ايه 5 كيلو من كل صنف خضار و 10 طماطم هم حيفتحوا محل خضري ههههههههه. لاحول و لا قوة الا بالله.. حافترض جدلا ان المكتوب صحيح مش فبركة في حل سهل جدا مكون حرفين.... لا.....

    اي التبذير و الإسراف ده كله ليه كده بجد يعني ليه ي بشر و بعدين شرعاً بقى العروسة معلهاش اي حاجه خالص لكن نظراً للظروف و العرف بنقول ماشي نشيل مع بعض عشان نحفظ بناتنا و شبابنا من الفحشاء و اسباب كتير نيجي نعمل الهم ده و كمان يبقى فيها معايره و كلام ملهوش لازمه في الآخره ده اي ده...اتقوا الله بقى

    ده اسمه استهبال وتخلف الجواز يعنى مسؤولية الاتنين اللي حيتجوزوا يعنى يجيبوا علي قد مقدرتهم واهلهم يساعدوهم شوية وعلي مقدرتهم علشان يحسوا أن البيت اللي بيبنوه ده مسؤليتهم يحافظوا عليه مش جواز علي الجاهز وخلاص وبعدين الاهل بيعلموا الولاد والبنات علشان يشتغلوا ويعتمدوا علي نفسهم مش علشان يجوزوهم كمان ويجهزوهم جهاز يخرب بيتهم ويمكن يتسجنوا كمان وبعدين يقولك الناس غلابة والحقنا ياريس الحقي ياحكومة الشباب مش عارف يتجوز شالله عنكم ماتجوزتوا لو الجواز كله كده ده قلة ادب وتخلف وهي العروسة حتسنعمل كل الحاجات دى اتقوا الله يا بشر

    طيب انا واحده متجوزه من 3 سنين احسب نفسي من الطبقه المتوسطه او فوق متوسطه ابويا رئيس شئون قانونيه ع المعاش وجوزي ظابط طبيب بالقوات المسلحه ومجبتش ربع الحاجات دي واي شي مش هستخدمه مكنتش بجيبه مثال داخله باجهزه كهربائيه كويسه لكن اللي هستخدمها هما 6 ملايات سرير تقريبا و الحلل طقمين اتنين سراميك و استالس .. الستراير رفضت اعمل براقع عشان التكلفه مش عشان اتجوز اجيب اجل ابويا .. صراحه الكلام ده مستفز جدااا ولاسف حقيقه

    هو المكيرويف والديسبنسر كانوا موجودين من ٢٠ سنه علشان تبقي عادات اصل العادات دي بتبقي متوارثه من اجيال لاجيال معتقدش ان دي عادات دي وساخه من اهل العريس ونطاعه ونقص مش اكتر لو مشينا في الجواز بالشرع يبقي الست متروحش بيتها الا بطولها والشملول هو اللي يشيل كل ده

    الموضوع ده مش جديد وبيختلف من مكان لمكان وفيه منهم كمان بعد ما بيجبوا كل الحاجات دي بالدِّين وإيصالات الأمانة مش بيقدروا يسدوا. وفي حالات كثير ام العروسة بتبقي الضامن عشان هي اللي تتسجن مش الأب المعيل يعني وتبقي من الغارمات وكده. وفي منهم يوم الصباحية بعد التفتيش علي الحاجه بيبيعوا نص الحاجات دي.
    ومن كم سنة احد البلاد عملوا قايمة كان أسمها قايمة ابو تريكة وخفضوا فيها الاعداد جدا وكبارات البلد قعدوا واتفقوا ان ده هيبقي العرف الجديد. مش عارفه ليه الموضوع منتشرش اوي مع انه اتكلموا عنه في كذا برنامج تلفزيوني.

    انا واحده من كرداسه وبقولك ااه فعلا بيحصل كده.. ولو يطولوا يجيبوا امتر من كده بيجيبوا عشان يبقي احسن من بعض ويتسابقوا.. ولسه اللي بيودوه بعد اول سنه جواز ودي اسمها العديه بتاعتها .. واللي زيه مرتين بتاع اول مولود.. فيه بلاوي اقسم بالله.. وده كله من الأمهات لمجرد ان الناس تاكل وشنا وعيب ومش عيب 
    احنا كبنات بقى اتخرجت من الجامعات وفيه منننا اللي اشتغلت وحققت نفسها فعلا بيتقال علينا عوانس واحنا لسه مكملناش ال 25 سنه .. وإحباط وقرف ووو.......
    كرداسة وناهيا والمنشيه والمجاملة وغطاطي وابورواش وغيرهم كل دول بيعملوا البدع.. وجشبي الله ونعم الوكيل في كرداسة اللي انا منها 

    انا متفهمه كل حاجة ولله الا حاجتين ،، اولا الست لبنات دول ، هتغلي كام كيلو لبن بس في المرة الواحدة ،، ولا الاربعين فوطة , دة لو استحمت كل يوم ، وتستخدم هي و زوجها ١٤ فوطة في الاسبوع ،دو الكوافير أو الاسبا مبيكونش عندهم اربعين فوطة :)

    فى الشرقيه بعد القرى بتعمل كدا وخاصه الزنكلون بلدى يمون الراجل معندوش 1000جنيه على بعضه ويجيب حاجات اكتر من دى او اقل لكن طبعا مش اجبار بس بيعايروا بعض زى ما بتقولك حاجه مستفزه لابعد الحدود والله لعنه وعادات عقيمه محدش راضى يتنازل عنها ومره بقول لاخواتى انا هجيب اللى احتاجه بس مليش دعوه بالكركبه والحاجات الكتير دى قالوا يعنى ايه لازم يجيلك احسن من اى حد واقول لامى هلغى النيش تقولى عشان يفتكروا اننا مش قادرين نفرشه ليكى ويطلع عيل يقول انتوا بتصعبوا الجواز واهل البنت بيتشرطوا ويقولوا شبكه اللى هى هترجعله ويقولوا حاجات غريبه اللى مش هتخرج بره بيته والله صعبان عليا حال الناس دى

    انا الستتين اللي بيحولوا البيت (واحدة من العمرانية و التانية من شبرًا الخيمة) بردو افحموني بالطلبات اللي لازم تتجاب للبنت لما تتجوز. الست يا عيني قعدت ٣ او ٤ سنين بتسد الديون اللي عليها من ساعة ما جوزت بنتها... 
    احنا ببنجلش كل الحاجات دي بالكم ده... صحيح في الآخر لما نحسبها بنصرف اكتر بكتير بس مش بالكميات الحاجات دي.
    يعني ايه هبل ٣٥ طقم ملايات و معرفش كام بطنية و كام بوتاجاز و دفاية و ....
    ايه الغباء المستحكم ده!!!

    يعنى حماتها لو عندها 4 صبيان المفروض ان 4 صبيان مراتتهم يجيبو بوتجاز 5 شعله يعنى الست دى لو حتجوز كل سنه واحد يعنى كدا حتغير البوتجاز كل سنه يا بختها والله الواحد مش عارف يغير حاجه من الاسعار هى بتغير كل سنه شوفى عندها كام ولد والله تخلف وعقليات متخلفه وعادات وتقاليد احنا اللى بنعملها ونرجع نقول ظروف المعيشه لمجرد ان واحد ميسور الحال عمل كدا يعنى الكل لازم يعمل كدا والله حاجه تحزن ناس بتموت من المرض وقله الفلوس وناس بدخل نفسها السجن مديونه عشان فلان جاب انا كمان لازم اجيب 

    انا قرات البوست انا عايش في الارياف اقسم بالله الحاجات دي عندنا مضروبه في 2 والغريب بقي ام ممكن تبقي شقه صغيره جدا ما بتشيلش الحاجه لكن عندنا الناس هي العروسه هي اللي بتفشخ نفسها. اسف للفظ مش جبرا عليها زي كرداسه .حسبي الله ونعم الوكيل سعات بقول الناس تستاهل اللي بيعملو فيهم السيسي

    ببساطة ... اللي بيعمل الاعراف دي الستات ...و اللي بيعايوا بيها و بيتعايروا بيها الستات و اللي بيمشي اي جوازة في مصر الستات و اللي بيوقف اي جوازة في مصر الستات ... و ده فيه استثناءات بسيطة علشان ما حدش يقولي مش صحيح ... أقوله الاغلبية كده

    ليه يعني!! لا بجد حد يقولي ليه!!؟ فيكوا إيه زيادة عن باقي البشر عشان التكاليف دي كلها؟؟! متصورين إنكم أحسن من الأمريكان و الأوروبين مثلا اللي بيتجوزوا في شقة استديو و حفلة علي الضيق كده؟؟! ما بعد كل ده جوازاتكم كلها فاشلة و كلها غم و نكد و بتجيبوا أجيال معقدة و متخلفة و يعملوا إعادة تدوير لأفكاركم و نفضل عايشين في نفس المستنقع!! علي إيه الأنعرة بلا نيلة..اللي يشوف كده يقول بتبيضوا دهب و لا بتتكلموا ١٠ لغات و بتنوروا في الضلمة!!!

    لما الست ام العروسة تمضي وصل على بياض عشان تجيب لبنتها كل ده وهي مش معاها وبعدين تتحبس لانها بقت غارمة فلامؤاخذة تستاهل وماتستحقش يتلملها فلوس ... الفلوس اولى للي محتاج بجد فقير او مريض ومش لاقي بجد ... مجتمع ايه وزفت ايه الي هيمشي الناس على مزاجه.. والمثل بيقول على قد لحافك مد رجليك .. مجتمع بيساهم في تمجيد العاهات والتقاليد غير المبررة والي مالهاش معنى.. نستاهل ضرب القباقبب


    من هنا يا جماعة انتشرت دعوة الشباب ضد النيش واللي فيه والشبكة الفضة ومش عارف ايه، شباب من المساكين اخوات بنات زي دي حكم عليهم أهلهم يصرفوا مبالغ مفزعة عشان يجهزوا اخواتهم البنات وكلها راحت في المظاهر الفارغة دي وييجي الشاب يجوز نفسه ما يقدر

    للاسف هو ده الواقع ف كرداسة والفقير والغني بيجيبوا زى بعض هنا مفيش سياسة انك تجيب احتياجاتك بس هنا عذاب انا بيصعب عليا الاهالي و الغلاء ال الناس فية وحدش بيرحم حد 
    انا شخصيا من كرداسة و جيبت احتياجاتي الشخصية ال هستعملوا ف مطبخي و اوضة نومي و رميت كلام اي حد ورايا العادات هنا صعبة الا ما رحم ربي مع العلم انا محامية بس غير منخرطة في عادتهم ال تودي ف داهية 
    ده كمان الراجل نسي يقولك ان ام العروسة بتودى لبنتها فطار و عشاء لمدة شهر كامل انتي متخيلة ده بقا غير الاخترعات العشاء الكبير والعشاء الصغير و خراب بيوت للاب فعلا

    للاسف النظام ده ماشي في الأرياف و المعايرة دي نقطة اساسية و التومرجي اللي كان عندي في العيادة جهز بنته بالسلف و الدين بس يمكن اقل شوية من اللي في البوست لكن لازم بوتاجاز خمسة عين و غسالتين واحدة نص اتوماتيك و دي اللي حا تغسل عليها و التانية مش حاتتشتغل علشان ما فيش ضغط ميه ! بس لازم تبقي موجودة ! بالمناسبة العروسة هي اللي بتجيب كل الحاجات دي و غالبا بتتطلق و ما تكملش سنة!

    الكلام دة مظبوط....و الحاجات بتبقي مفروشة و محطوطة قدام كل اللي بييجي يبارك و لازم يفرج الناس الحاجات و الناس تعد الحاجة....بيجيبوا بالدست... يعني دستة فوط مطبخ ...دستة فوط حمام...دستين ملايات....و كل أنواع الحلل"بالأطقم" و فعلا غسالتين و أجهزة كهربائية لها العجب....و المعايرة بتبقي بينهم شديدة...و لازم كل واحدة ما تقلش عن اللي قبلها...و طبعا بيحاولوا يزودوا

    الموضوع المطروح خطير جدا و يدق نواقيص خطر اجتماعية متعددة اﻻبعاد على اﻻسر المصرية محدودة الدخل و هى الغالبية العظمى من الشعب المصرى. و قد طرحت على صفحتك يا اميرة هانم عدة افكار و حلول فى اطار a think tank process فى غاية اﻻهمية نتمنى ان تنتج اثرها و ﻻ تننتهى هنا .و ذلك من خﻻل بلورتها و تصعيدها للجهات المسئولة لتبدأ حملة توعية قومية على مستوى عال للقضاء على تلك العادات المدمرة.

    كان في مره حلقه دعاء فاروق عملتها و اتكلمت عن الحوار ده و قالت ان في ناس فعلا ممكن تتسجن بسبب تاخيرها في دفع الاقساط للاجهزه بس عشان خاطر تجوز بناتها يعني مثلا قالت 
    ان لازم ٢ تليفزيون و ٢ رسيفر و ٢ تلاجه او تلاجه و ديب فريزر و ٢ فرن واحد فرن كهرياء و التاني ميكرويف و قالت كمان إن لازم من ٣٠ ل ٥٠ ملايه و ٢ مفرش سرير كبير ساتان و زيه لحاف فيبر و عدد البطاطين يبقي ضعف عدد السراير ده غير الصيني و حاجه النيش و الذي منه و لبسها كله صيفي و شتوي و ارواب و عبايات استقبال حتي لو مابتلبسهاش

    ايه كل دا وهما بيجهزوا البنت بيجهزوا حماتها ليه ليه حماتها دى لو عندها ولدين او تلات كل واحده حتجبلها بوتجاز دا تخلف وهبل ليهم حق يبقوا عاوزين يخلفوا ولاد بس وايه الف ج ورد للشقه معن ام الشقه ماترينت دا حيدبل ويترمى

    حضرتك الطبقة دى كلها كده اومال ليه الغارمين والغارمات مش بيخلصوا. سيادتك انا سمعت نفس الكلام ده من الشغالة والجناينى وحارس الامن واللى بيصلح الشنط والجزم. ليه؟ لانهم بيفرشوا كل الحاجات دى فى الشارع وبيزايدوا على بعض دى جهازها فرش نصف الشارع لا دى فرش لاخر الشارع وهكذا. وبينقشوا على الحلل اسم العروسة عشان لا يستعمل فى جهاز اختها مثلا. الشغالة متجوزة من ١٨ سنه ولسه عندها اطقم حلل لم يتم استخدامها. واللطيف انهم بيتجوزوا فى اوضه وصاله

    فعلا دا بيحصل كمان فى قرى المنصوره ؛ انا شوفت بعينى فى قريه هناك ؛ عفش عروسه ؛ 8 عربيات ربع نقل مليانين ؛ من كل الاجهزه 2 وعربيه كبيره نص نقل للبس العروسه ؛ وهدوم وغسالة اتوماتيك لحماتها ؛ وشنطة لبس لاخوات العريس ؛ من هنا عرفت اننا هنفضل دول عالم مش تالت لا دول عالم 3000000 مليون سنه قبل الميلاد



    ودى كانت جملة من التجارب والاراء للشباب من الجنسين على سؤالنا فى التجربة على موقعكم تجارب كوم انت كمان ممكن تضيف تعليقك على الموضوع فى الاسفل
    دايركت
    @مرسلة بواسطة
    كاتب ومحرر اخبار اعمل في موقع احلي يوم .

    مقالات متعلقة

    تعليقات: 0

    إرسال تعليق