الكهربائي بيركب عندى كهرباء دلوقتي فى البيت تنصحونى بايه ؟

اعمل حساب خط التكييف حتى لو مش هتركب يسحبلك ف كل مكان 3نقط ف السقف وكل نفطه بمفتاح و المطبخ اعمل ف كل جنب ع الاقل علبتين او تلاته وبلاش يعملك علب تجميع فوق خليه يعملها ف علبه افضل  ونصيحه متجبش ف التشطيب فينوس خالص

بص يصديقي متبخلش عليه ف الاسلاك اولا هات سلك سويدي معتمد خليه يسحب الاناره والبرايز 2 ملي والمطبخ والتكيفات 4 ملي ع حسب المسافت شبكه الدتا تتأسس صح بجانب انك قبل متعمل بريزه تكون محدد استخدمها غرف النوم والاطفال بالمتر وحدد مكان السراير والدولايب ومكان الشاشات بحيث متحطش فيش وميبقاش ليها استخدم خليه يوزعلك احمل اعمل مفتاح كنج هاوس خارجي بجانب القاطع الداخلي متخلهوش يمشي دش مع كهربا او تليفون خد كل نقطه دش لفوق ع الطبق بلاش لحمات ربنا يكرمك ويكون كهربأئي كويس ويشتغل ع رشب ويكون عنده ضمير ف سحب السلك وشكرا

ركب مفتاح فصل للتسريب الأرضي Earth Leakage Circuit Breaker عند المغذي العمومي للشقة علشان لو لا قدر الله اتكهرب، المفتاح يفصل لحظيا و تكون الصدمة بسيطة إن شاء الله و كمان تضمن أن الكهربا تكون فصلت عنه. النوع المحترم هتلاقيه من 500 ل 700 جنيه. قد يبدو غالي شوية بس سعره ولا حاجة جنب حياة إنسان

اعمل مفاتيح للتكيف ف كل غرفه حتى لو مفيش امكانيه تركيب دلوقت ... مفتاح ل متور ميه او الغساله عشان متكسرش بعد.كده وياريت تكون الاسلاك كلها ضغط عالى

اعمل السخان وصله لوحدها واعمل حساب التكيف والمطبخ كتر الفيش فيه وطبعا الفيش تبقى كتير ومتكنش قريبه من الارض

اعمل فيش كتير ف المطبخ والطرقة واعمل واحدة ولا اتنين ف الحمام وباقى فيش الشقة اعملها فوق لانى عملتها تحت وندمت مش عارفين نستخدمها 

هات نوع برايز اسمة باتشينو دة مضمون جداا وعملى هاتو بالعلبة جملة من سوق الكهربا ف العتبة

اهم حاجه الاسلاك تكون جوده عاليه علشان التكبفات اقل حاجه 4مم.

قلل اسبوطاط ملهاش لزمة ومصاريف كتير وكتر فيش وخليه ينسق مع بتاع الجبس ده لو انت لسه في التأسيس

ميكترش الفيش ... لانه هيكتر علي الفاضي علشان يا خد فلوس كتير ثانيا متنساش فيش الدش والتليفون ثالثا عليك وعلي سلك السويدي او دريم

اعمل فيش كتير ف المطبخ وعلي حسب توزيعه العفش ولو النجف عندك لمباته كتير خليه يقسملك كل نجفه علي مفاتحين كهربا بحيث تخفف الاستهلاك - فيشتين يمين وشمال السرير علشان ما تتخانقش انت ومراتك عالفيش خلي لكل واحد فيشه للاباجوره وفيشه للشاحن

خليه يعرفك لما الكهربا تزيد تقفل العداد ازاي عشان ميحسبش فلوس عليك

اتفق معاه الاول علي المصاريف بتاعته ايه وبلاش المقاولة انه يقولك مبلغ كبير لا حاسبه علي النقطة 

ركب فيش كتير بتبقي حلوة وفيه نوع امان مش بيكهرب لو الاطفال لعبوا فيه بس غالي 

ولمبات كتير بردو بحيث تكون الاضاءة مريحة بالنسبالك حتي لو هتجيب سخان غاز اعمل فيشة لسخان كهربا احتياطي وفيش كتير في اوض النوم ونبي بمستوي السراير عشان الشواحن

خليه يعملك سماعات في الحيطه في كل حجره وانت بعدين هتشتري جهاز صغير بيشتغل موموري وفلاشه وراديو وبيبقي ليه زراز في كل حجره عشان لو عايزه تشغله في مكان ومكان لا

اول حاجة خليه يعملك خط للبرايز لوحده 3 ملم سويدي

وخط للانارة لوحده 2 ملم سويدي

وخط الغسالة لوحده 4 ملم سويدي

وخط السخان لوحده 4 ملم سويدي

واعمل خط تكييف في كل غرفة حتى لو مش هاتركب تكييف بس احتياطي 4 ملم سويدي وخليه يزودلك برايز في كل حائط ومكان الشاشة يسحبلك خرطوم للدش مستقل  ولو هاتعلق مراوح سقف ومافيش جنشات خليه يجيبلك جنش ويعلقه على سيخ حديد في السقف

خلي الفيش علي خط و الاضاءه علي خط منفصل، اعمل فيشتين في كل حيطه في كل اوضه، خلي فيه فيش واطيه و فيه فيش عاليه، هتحتاج الاتنين، اعمل اكتر من لقمه في كل فيشه، اعمل فيش في المطبخ علي قد ما تقدر بشرط تكون بعيد عن الميه او تكون معزوله كويس، اوعي تنسي تعمل فيش في البلكونه،  طبعا لازم خطوط تغذيه منفصله للتكييف و السخان و اي احمال كبيره، اعمل حساب مراوح السقف مع اضاءة السقف علشان متبقاش مضطر تلغي الاضاءه لما تيجي تركب مروحه.  مفاتيح الاضاءه في اوض النوم تتعمل ديڤياتوري، و يكون ليها مفتاح تشغيل جنب باب الاوضه و مفتاح جنب السرير( الكهربائي فاهم), مفتاح اضاءة الطرقه كمان يكون ديڤياتوري و له مفتاح تشغيل في اول الطرقه و مفتاح في اخرها،  متعملش اطباق في الحمامات و المطبخ، خليها اضاءه عاديه او دلايات مفتوحه

اعمل حساب التكييف وقسم الشقة كويس علشان الحمل الزيادة ، اعمل حساب خراطيم زيادة علشان سلك التليفون لما تقدم عليه مايبقاش بره الحيطه ، اعمل حساب انك ممكن تشيل النجف وتركب مراوح سقف مثلا فدورعلي مكان الاضاءة البديل واعمل حسابه ، ماتملاش الخراطيم بالاسلاك ، زود احسن ما يجي وقت تبقي عايز تسحب سلك ماتعرفش لان الخرطوم مليان

علبه الكهربه الام بلاش تركب الكبس المجوز 70 جنيه خلي الفردي عشان لما يضرب لا قدر الله تغيرو بس بسعر اقل

كتر فيش المطبخ عشان الاجهزة تلاجه و شفاط وميكرويف وفرن وغلايه وبوتاجاز وغساله لو هتحطها في المطبخ وخلاط زود الفيش بجد في المطبخ عشان كل الحاجات دى مش كويسه في المشترك وممكن يعملوا قفله او المشترك يضرب والستات بتعانى من الموضوع ده

ركب مفاتيح عاليه للتكييفات في كل اوضه احتياطى حتى لو مش هتركب تكييف دلوقتي

جنب باب الشقه مفاتيح نور الريسبشن طبعا و خليه يعملك اللمبه الاوتوماتيك اللى بتنور مع فتحت الباب لوحدها حلوة اوى

سلك الدش من الحيطه جواها ويعمبك كوبس تدوسى عليه يفتح الدش والفيش من الخارج هاتى اللى عليها بلاستيك او جلد سيلكون ده غطاء عشان لا ميه ولا اطفال يجوا فيه  وارمى تحت الارض سلك التكييف احتياطى والفون  واعملى مفتاح لكل حاجه للمطبخ عشان الضغط وهاتى لمبات فينون وات قليل

المصابيح اللد تغني عن النجف .... استخدم المفاتيح العريضة ... ربنا يعينك

الدش والتليفون فى فيشه فى كل الاوض وكل مفاتيح النور تبقى جنب الباب و فيش جنب السراير للابجورات فيش كتييير فى المطبخ فوق مش تحت وشوش الكهربا تكون بغطاء جامد علشان الاطفال زراير للتكيف لوحدها والغساله حتى لو مش هتركب دلوقتى

اعمل حساب التليفون .والتكيف. والدش.والنت وزود الفيش في المطبخ في كل ركن.وللرخامه فيشتين فوق وفيشتين تحت علشان غساله اﻻطباق والفيلتر لما تحب تركب واعما حساب جرس ونور بره الشقه وخلي العدادات بره وفيشهفي كل بلكونه

اعمل حساب واصلة النت اهم حاجة واعمل حساب كهربا ومكان التكييف السلك بيكون اقوى شويه عشان يتحمل هات انضف حاجة  السخان اعمل حسابه كهربا اوعى تركب غاز  خلى يبقى في فيش كتير ف الاوضه

اعمل حساب الموبيليا يعنى خلى زرار. النور فى اول الحيطه جنب الباب ولو غرفه ليها بابين زى الصالون يبقي للنور زرار جنب كل باب وكتر الفيش فى كل الحواءط وخاصة المطبخ والنوم

كتر الفيش ف المطبخ حوالي 7 , المكان اللي هيكون فيه التليفزيون بردو يكون فيش كتير , خلي مكان الفيش عالي عشان الاطفال ان شاء الله  , الاسبوتات بتخلي اضاءه الشقه حلوه بس بتسحب كهربا كتير , خليه يعمل وصلات زياده لاي وقت هتركبو مروحه او مكيف

خلي كل نص متر فيشه بمعدل أربع فيش في الغرفه...خليه يعملك وصلة تكييف حتي ولو مش هتركبه دلوقت

اعمل في غرفه مروحه سقف وسيبك من جو النجف والكلام ده ...متركبش لمبات نيون عمود خليها كلها ليد وكتر منها...لو أنت في دور علوي وعندك ماتور مياه تحت.. خليه يعملك زرار موصل لتشغيله في الحمام والمطبخ...خليه يركبلك شفاط في المطبخ والاهم في الحمام علشان السخان والبخار ...وفي النهايه بقولك أسألك متجوز ومتسألش كهربائي...تحياتي والف مبروك مقدما

زود فيش هاتتقلب حياتك لمشتركات كتير واعمل برايز دش وتليفون عشان لو هاتنقل الراوتر في كل أوضه واعمل حساب مفتاح تكييف في كل أوضه عشان لو ربنا فتح عليك بعدين مش لازم تجيب السويدي الأصلي عشان مكلف في انواع وسط قشطة هات خراطيم علاء الدين نضيفة ماتدفعش كتير فاللقم والوشوش هاتها ساس حاول تظبط شقتك ليد صحيح هايكلفك فالأول بس هايوفرلك كهربا ومبروك أن شاءالله..... ونسيت اقولك انت لو من القاهرة انزل شارع الكهربا إلى لازق فالمطافي الحاجة بنص التمن وهي هي الي برة

كتري الفيش بالذات في المطبخ اعملي حساب فيش جنب السرير فيش جنب التسريحة فيشة كهربا جنب حوض الحمام بس عالية خليه يعملك زرار زي بتاع المتور للغسالة اعملي كهربا التكيف احتياطي في كل اوضة وفيش تليفون و نت حتي او مش هتعملي دلوقتي الفيش خليها فتحتين مش تلاتة لان التلاتة اللي في النص مش هتعرفي تستخدميها في اغلب الاوقات

نصيحه مني . اعمل لكل بريزة مفتاح بجوارها . بدل سحب الفيشه كل شويه .... بمعني اذا أردت أن تغلق التلفزيون او اي جهاز آخر ما عليك إلا أن تضغط علي المفتاح فقط

كتر من البرايز اعمل برايز كتير في كل ركن ووصلات تليفون والبرايز خليها عاليه عشان الاطفال وتكون برايز امان بسددات واهتم جدا جدا بالاسلاك لا تقل عن 3 ملي واعمل حساب التكييف ووصلات الدش وركب لمبات ليد متكترش من النجف عشان مالهوش لازمه ولو جبت نجف يبقي دوايه عاديه مش دوايه بلحه

1) لو هتغير اسلاك، هات نوع كويس وسمك لا يقل عن 3مم للاستخدام العادى، ولا يقل عن 4 مم لوصلات التكيف

2) اعمل وصلة تكييف فى كل غرفة، حتى لو مش هتركب حالياً، وكل وصلة بمفتاح Circuit Breaker (أو ماجيك بلغة السوق) ومفتاح بيشينو لكل تكييف

3) مفتاح بيتشينو للغساله

4) اعمل حساب وصلة لموتور المياه بمفتاح سلم واحد فى الحمام وواحد فى المطبخ (حتى لو هتركب موتور ببلونه او اتوماتيك)

5) اعمل حساب وصلة ريسيفر فى كل غرفة محتمل تركب فيها تليفزيون

6) اعمل وصلات شبكة LAN فى كل غرفة بجوار وصلة الريسيفر، عشان لو هتركب تليفزيون سمارت، لان اغلب التليفزيونات الاسمارت الـ wireless network فيها دائما ضعيف ومشاكله كتير.

7) اعمل حساب فيشيتين على جانبى سرير غرفة النوم، ومفتاح اضاءة يمكن التحكم فيه وانت على السرير (اضاءة قراءة قبل النوم)

8) الاماكن اللى ممكن تركب فيها نجف، اعمل حساب مستوين اضاءة، يعنى مفتاحين لكل نجفة، كل واحد يتحكم فى مستوى اضاءة.

9) اعمل مفتاح ثلاجة، فى باب الشقة، بيبقى ظريف ومفيد جدا لما تفتح الباب والمدخل ينور اتوماتيك welcome light

10) اعمل حساب وصلة كاميرا من الباب لحد تليفزيون غرفة النوم، عشان تقدر تشوف مين على الباب بدون ما تحتاج تقوم وتتحرك لحد الباب

11) اعمل الجرس بمفتاح يمكن فصلة،مهم جدا المفتاح دا

12) اما لو بتفكر تعمل حاجه مميزة Smart Home وتتحكم فى كل دا بالموبيل، دا ترتيب تانى خالص

خلي العمومي ١٦ ملي او أقل حاجة ١٠ ملي ولو هتعمل مكيفات خليها ٤ ملي وللبرايز ٢ ملي والإضاءة ١ ملي وخليه يعملك النجف عل خطين وخلي المبة الي علي باب الشقة من برة دفتير ولو تعرف تحدد مكان التليفزيون بالظبط خلي البريزة وسلك الدش خلف مباشرة

اولا ...كل تكييف لية واصلة لوحدة من اللوحة 

ثانيا ....حط فيش في كل حيطة ...صدقنى حتنفعك جامد

ثالثا ....اعمل بوكس تجمييع لكابل التليفون وبوكس لكابل الدش ....اوعى اوعى اوعى تعملهم مناولة من فيشة للتانية 

رابعا ....اعمل حساب فيشة للسخان الكهربا لو حتتستخدمة وبردوا عسالة الملابس والاطباق

اعمل بوكس تجمييع لكابل التليفون وبوكس لكابل الدش ....اوعى اوعى اوعى تعملهم مناولة من فيشة للتانية

الكهربائي بيوصل سلك سماعه لكل غرفه و بيتجمع فمكان ممكن انت تحط فيه كاسيت او المكان اللي هاتحط فيه الكمبيوتر او قريب من مكان التليفزيون و بيتعمل لكل غرفه مفتاح و بعد ما تشطب الشقه بتشتري السماعات اللي تحبها و تركبها و لما تشغل اغاني قراءن فيلم يشتغل ف الشقه كلها او الغرف اللي انت فاتح الزرار بتاعها و عيش اللحظه بقى

يعمل فيش كتييير وتكون فوق 

بلاش يعمل توصيل للسلوك وسمك السلك يكون كبير

النجف يعمل كل ٣ لمبات بمفتاح 

لو ف جيبسون بورد يعمل كل صف بمفتاح 

يعمل سماعات مدفونه اتنين ف كل حجره عشان سورة البقره والرقيه تشتغل ف الشقه كلها وفي المطبخ عشان زوجتك تسمع وهي بتطبخ ومتزهقش

مبروك مقدما

انصحك ١٠٠ مرة بنوعية السلك اللي داخل الحيط يبقي نوع كويس ويتحمل الضغط لأني غلطت الغلطة دي ولما باشغل التكييف مع الميكروويف بيعمل قافلة فااهم حاجة نوعية السلك

اعرف انت هتحط ايه وفين وبناءا عليه وزع الفيش بتاعتك مش بالكترة ممكن تكلف نفسك فيشة وفى الاخر تيجى ورا دولاب أو كنبة ما تستفيدش بيها ..ركز كمان هتحط الشاشة فين عشان يعملك اكتر من فيشة وراها على طول ما تبقاش ورا الشاشة غابة أسلاك ..

واعمل فيش كتير فى المطبخ واعمل منها فيش منخفضة عند وصلات السباكة بتاع الغسالة وتحت الحوض عشان لو حبيت تركب فلتر ب 7 مراحل ..

اعمل حسابك لو مكان هتحط فيه ابليكات تظبط توصيلاتها من الأول عشان ما تهدش وتمحر تانى تانى

جرس يرن من المطبخ ف الانترية لو عندك ضيوف او ماشابه ومش لازم تنادى او تدخلى او يكون اصدقاء الزوج هترنى رنه وهو هيفهم المطلوب

هترسم العفش الاول علشان متعملش فيش كهرباء ملهاش لازمه 

و زود فيش في المطبخ 

لو هتركب تكييفات ممكن تسحب كل تكييفين في غرفتين جمب بعض في ماسوره واحده على ارضي واحد هيوفر معاك

متستخسرش في الخامات نهائي انت بتعمل حاجه تعيش العمر 

شوف هتحط التلفزيون فين و اعمل فيشتين و خدمات وراه بالظبط علشان المنظر و اعمل حساب تلفزيون في أوضة النوم

خلي الفيش كلها عاليه لأني عملتها عندي واطيه بقت تتداري ورا الاثاث وكمان الاطفال بيحاولوا يستعملوها وممكن يتكهربوا جبت الكهربائي تاني وغيرلي كل الفيش وعملها فوق

فينوس اسم شركه نوع اللمبه ليد علشان استهلاك الكهرباء اللي سعرها ولع 

وخليه لو عندك سقف معلق فيه لمبات كتير يوزعهم غلي كذا خط وكذا مفتاح علشان الاستهلاك

ادرس توزيع الفرش و مقاساته قبل ماتشتريه عشان تقدر توزع المفاتيح والبرايز في الغرفة في اماكنها الصح ومتجيش ورا كنبه او سرير ومهم توزيع فيش المطبخ ولازم تكون بزياده.. 😊

- أسس خطوط التكييف لكل الغرف حتى لو مش هتشتريه دلوقتي..

- الإستعانة بمهندس خبير في إستلام أعمال الكهرباء مهم جدا ☺

- خلي بالك من السلك المضروب و اشتري المعتمد من مكان ليه سمعه و كبير بفواتير ويكون معاك الكهربائي او مهندس خبير

افضل خامه هي السويدي للكابلات ومهم توزن لفة السلك و طابقه مع مواصفات السويدي 😉---- 

الكهربائي يركب علب الكهرباء علي منسوب البؤج اللي عملها مبيض المحاره ونحدد اماكن العلب وكل علبه تخص ايه ، واهم شيء رفع شيرب الشقه لضبط ارتفاع العلب من الأرض ومهم تشتري السلك لأصلي بنفسك عشان المضروب كتير لو مش هتروح المصنع في مدينة العاشر من رمضان او متعرفش موزع ثقة يبقى لازم يكون معاك عينة من الأصلي و انت بتشتري . 

ملحوظة 1 : ( سلك الغسالات والسخانات 4 ملم / خطوك التكييفات 6 ملم / البرايز 2 ملم / الإناره 2 ملم او 1.5 ملم ) .

ملحوظة 2 : لازم يكون الصنايعي كهربائي ثقة و شاطر و تراجع على شغله ( وزن العلب و مناسيبها - اتأكد ان كل المفاتيح شغالة و البرايز تجربها ممكن يكون في سلك متسحبش و تستلم الشقة منورة - اللوحة منظمة ومتسترخصش في مفاتيح اللوحة اشتري شنايدر أو هاجر وخلي بالك من المضروب ) .

و أي خدمة :

اعمل حساب تكيفات في كل الغرف

اعمل مخرج دش و تليفون في كل غرفة

عرفو الشقة هتتفرش ازاي علشان يحدد سلك لكل حاجة 

في حاجات بتحتاج سلك ٢ ملي و ٣ و ٤و ٦

اعمل ديفيدير عند السرير علشان ما تتخنقوش مين يقفل النور

و ممكن تعمل ديفيدير في الطرقة

فيشة جنب السرير يمين و شمال للشواحن لو بتشحن التليفون جنبك

كتر الفيش فالمطبخ والريسبشن ظبط أماكن الإضاءة يعنى نجف اسبوتات ابليكات زود الفيش برده نصيحه ما تبخلش بالفيش كمان علشان المكنسه وعلشان لو حبيت تغير النظام وماتعملش كله عالي لأن شكل السلك بيبقي وحش اوى وتجيب السلك اللى جو الحيطه نوع حلو معرفش اسمه اسمه ايه ولا رقم كم بس يستحمل وكمان فالمطبخ اعمل فيش غسالة اطباق وصرف لها وكمان خلاط وميكرويف وتلاجه زود حتى لو مش هتجيب كل الأجهزة دى واعمل وصلة تكيف كل الحاجات دى هتوفر تكسير فالحيطه بعد كده

ركبى انواع مفاتيح نضيفه زى سانشى نوعه حلوه جدااا واثنا التاسيس يبقى الشغل منظم على فرش الاساس واحسن حاجه تكون خامه السلك اصليه من التوكيل زى السويدى وكل غرفه يبقى له تكيف ليه خط لوحده وكل غرفه ليه خط 

خلي الفيش ف مستوا عالي شويه عشان اما ربنا يكرمك بأطفال متخافش عليهم من الكهربا 

ويخلي كل اوضه ليها فيوز لواحدو ولو فيه تكييفات يعملها فيوز لواحدو عشان لأقدر الله لو حصلت مشكله ف اي مكان من دول الكهربا متتفصلش عن باقي الأماكن 

متسترخصش ف الأسلاك وهات نوع نضيف

خلي فيه كذا فيشه جنب السرير من الناحيتين

التليفزيون تعمله داخله بخرطوم ناشف لحد مكان التليفزيون عشان سيلك الريسيفر

وهتعمل خرطوم لكل اوضه لو انت ناوي ف يوم م الايام تركب تليفزيون ودش ف للاوض

متستكترش الفيش خليه يعملك ف كل حيطه شويه فيش حلوين عشان مع الوقت هتحتاج فيش واعمل برضو خرطوم لسلك التليفون ف كل اوضه اعملها دخله ومكان لفيشه 

متنساش تعمل فتحه لمواسير التكييف وتعمل مكان لكهربته

وممكن عشان تريح دماغك انزل هات حد بتاع تكييف يظبط مكان التكييف عشان اما تفكر تركب تكييف ف اي قوضه متكسرش حاجه ف الشقه

واعمل حساب الشفاط ف المطبخ 

لازم تحاول تقسم الشقة لاجزاء .. اكتر من 4 .. وكل جزء بمفتاح اتوماتيك ..

حاول تزود عدد الفيش على قد ما تقدر في كل حائط فيشتين .. وارتفاهم حوالي متر ونص علشان الأطفال .. 

المطبخ بقي زود الفيش وخليها في ارتفاع اعلى من الرخامة ب 15 سم ... 

تقسيم الاضاءة في كل اوضة لعدة مراحل قوية ومتوسطة وضعيفة.. 

اعتمد على اللمبات الموفرة في الريسبشن لكن في النوم واوض الاطفال بلاش .. خليها نيون عادي علشان القراءة 

لو جايب الفرش ارسم مخطط كروكي لكل اوضه عشان ما تركبش برايز وفي الاخر تيجي ورا كنبة ولا ورا سرير .

بالنسبة لاوضه النوم ، لازم برايز فوق كل كومود ومفتاح انارة يتفتح من ناحيتين ناحية فوق الكومود والتانية جنب الباب ، وبريزة للتسريحه وبريزة للمكتب ولو عامل حسابك على تليفيزيون يبقي بريزتين في المكان اللي هتحط فيه التليفيزيون وماتنساش مخرج للتلفيزيون ومخرج للتليفون 

بالنسبة للحمام ، بريزة واحده جنب المراية ومفتاح انارة اقرب ما يكون للباب، ولو هتحط غسالة يبقا فوق الغسالة بريزة

الصالون: بريزتين للتليفزيون والراوتر ومخرج دش ومخرج تليفون 

لو هتحط اباجورات يبقا مكان كل اباجوزة بريزة

ولو في ترابيزة في الجنب يبقا فوق الترابيزة بريزتين 

اما المطبخ هتحط 3 برايز يتوصلوا عالتوازي وبريزة للثلاجه وواحده كمان للبتوجاز وواحده للشفاط

وخلي كل غرفتين مش جنب بعض على مفتاح رئيسي واحد 

وجيب تابلوه كهربا فيه مفتاح او مفتاحين زياده عشان مستقبلا لو حبيت تحط مكيف 

واستخدم اسلاك من شركة معتمدة زي السويدي وكابلات 

بالنسبة للانارة فشوف اللي عمل لك الجبسوم بورد