جمعنا مجموعة كبيرة من الشباب من الجنسين عشان نعرف اجابتهم على تجربة اختيار شريك الحياة المناسب وتم تصفية اهم الاجابات ووضعها بين يديك لتساعدك فى اختيار شريك الحياة المناسب على موقع تجارب كوم تم تقسيم الاجابات كل تجربة ورأى فى فقرة اى ان كل فقرة تعبر عن راى شخص واحد فقط
سؤال التجربة :
ممكن كل واحد يقولنا تجربته في اختيار شريك الحياة المناسب .. بمعنى ايه الحاجه المهمه اللي انتا لازم تفكر فيها قبل اختيار شريك الحياة المناسب لأنك تكمل نص دينك ... وفى نفس الوقت لازم يكون في حب قيل الارتباط لأن المشاكل بتكون كتيره بسبب عدم معرفتهم ببعض قبل الارتباط ولا ملوش علاقه ؟
ياريت كل واحد يقول تجربته أو يقولنا وجهه نظره في اختيار شريك الحياة المناسب ؟
وكانت اجابات الشباب والبنات على سؤال كيفية اختيار شريك الحياة المناسب كالتالى :
فى اختيار شريك الحياة المناسب اتبع الحديث تنكح المرأة لأربع لمالها و لجمالها و لنسبها و لدينها فاظفر بذات الدين تربت يداك
حاليا اهم شئ فى اختيار شريك الحياة المناسب تكون متربية وعندها حياء ومش اجتماعية خالص لان اي خلل ف الحاجات دي هينتج عنه واحدة معقدة بالذات فى الظروف والحياة اللي وصلنا ليها بعد كدة تاني اهم حاجة انها ترضيك عشان تعفك لان مينفعش تبقي متجوز وتروح تدور علي واحدة تخون معاها الحاجتين دول لو فيهم خلل مش بيتعالج اي حاجة تاني بعد كدة سهلة وبتتعالج
عند اختيار شريك الحياة المناسب لازم يكون انسان صالح ومصلح ويكون انسان بيفهم وطموح ويعرف ان الجواز دا مسئوليه وميدخلش حد فى حياتنا ويكون بنى ادم فعلا عاوز يبنى اسره مش مجرد انه يتجوز وخلاص ويكون فيه من شخصيه سيدنا عمر بن الخطاب
اسال علي امها شوف الناس هتقولك ايه البنت مراية امها دى تجربتى فى اختيار شريك الحياة المناسب
عند اختيار شريك الحياة المناسب لازم تكون محترمه وبنت ناس وطيبه وتتحمل مسؤوليه وسيبك من موضوع ان لازم يكون في حب ده مش بيأكل عيش
شوف حماتك عامله ازاي هتعرف البنت اتربت ازاي مهما كانت البنت شخصيتها مختلفه لان ضرورى اختيار شريك الحياة المناسب بعد الجواز والسنين هتقلب علي امها بالظبط
هيا الخطوبه عشانً يعرفو بعض مش عشانً يدبسو ف بعض يعني يشوفو هيعرفو يتعايشو مع شخصيات بعض ولا لا اهم صفه عندي الامانه فى اختيار شريك الحياة المناسب
سيبك من موضوع الحب ده مبياكلش عيش اهم حاجة انها تكون قد المسؤولية علشان حالات الطلاق متزديش حالة كمان
اهم حاجه ف اختيار اختيار شريك الحياة المناسب انه يراعي ربنا فيها ويعاملها كويس ويحترمها اهم من كل حاجه لانها لو بتعشقوا مع الايام بسوء معملته ليها هتكرهوا حتي لو هي فاكره انها هتفضل تحبه القلب يميل لمن يحسن اليه
والرجل عند اختيار شريك الحياة المناسب يبحث عن البنت المحترمه لان الحاجه الوحيده اللي مش ممكن اي راجل يقبلها علي نفسه ان يتزوج واحده ممكن يشك فيها في يوم من الايام وفى الاخر لو الاتنين طبقوا كلام الله ورسوله هتبقا الحياه افضل
البيت اهم حاجه فى اختيار شريك الحياة المناسب دور ع بيت فيه رجل محترم اهم حاجة تشوف بيت يكون فيه راجل حازم ميكونش الراي للست عشان هتتعب خالص
اجبلك من الاخر اختار بنت الاصوووووول وبس لما تيجى تختار شريك الحياة المناسب
اولا لما تبدأ فى اختيار شريك الحياة المناسب تختار بيت فيه راجل وحط خط تحت راجل .يعنى يكون الكلمه كلمته مش كلمه الست وتكون امها مشيه ورى جوزها مش جوزها الى ماشى وراها والبنت تختار الزوج يكون راجل واد كلمته ويكون اهله بالنسبة له رقم واحد لان لو كان بيحب اهله هيحبها ويحافظ عليها
يكونو اهلها بيعرفو الأصول وكلمه الراجل يكون لها وزنها وتكون امها متربية لان البنت بتطلع لامها وابوها يكون محترم وتكون تقدر تشيل مسؤلية وتكون ست بيت في بيتها وأم كويسة لأولادها وتكون بتخاف ربنا وبتصلي وفى نفس الوقت يكون دمها خفيف ومثقفة حبة وفى الاخر خالص كمان لو جميلة شوية يبقي انت كده ربنا بيحبك وان شاء الله لو لقيت حاجه زى كده شوفلي معاك #اختيار شريك الحياة المناسب
اهم نصيحه بقولها لأي حد اوعي تتجوز عشان تفرح اهلك بس او انك تبقي متجوز وخلاص دي بداية فشل اي علاقة لازم تتجوز اما تشوف نفسك قادر تاخد خطوة زي دي وعندك تحمل للمسؤلية
اهم حاجه فى اختيار شريك الحياة المناسب تكون البنت ال هترتبط بيها بنت ناس واهلها محترمين وتسأل الف مرة على الام لان ف أمهات بتخرب ع بناتها
وتابع الشباب تجربتهم فى اختيار شريك الحياة المناسب فقالوا
الحب ممكن يجي ف فترة الخطوبة او بعد الجواز واعرف ناس كتير مش كانوا يعرفوا بعض واتجوزوا تقليدي وحبوا بعض جدا وسعداء فى حياتهم وناس كانوا يعرفوا بعض قبل الجواز واتطلقوا بعد كام شهر فالحب مش مقياس فى اختيار شريك الحياة المناسب
اهم شئ انت اولا اعرف واجباتك كزوج كمعرفتك بحقوقك واعلم ان الكمال لله وحده ادعى ربنا رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ وَاجْعَلْنَا لِلْمُتَّقِينَ إِمَامًا اسال كويس فى محيط زوجة المستقبل سواء العمل او السكن او الدراسة واظفر بذات الدين واستخير قبل الارتباط والرؤية الشريعة حدد فيها الخطوط الرئيسية بينك وبينها واسمع منها هى كمان اتفقوا مع بعض فى حالات الخلاف هتتصرفوا ازاى انوى خير واتقى الله بعدها توكل على الله وامشي بمبدا لاتنسوا الفضل بينكم وكل ما فى الامر ان يكون كل منكم شخص جدير بالحب لا يمن ولا يعدد ما فعل لاجل الاخر اقرا كتاب الرجال من المريخ والنساء من الزهرة وكتاب لغات الحب لاتجعل اى تجربة زواج سلبية تؤثر فيك او فيها وتذكر انه ميثاق غليظ ومهما حدث بينكما لايخرج ابدا لاحد الاحترام قبل الحب وفى النهاية اظفر بذات الدين #اختيار شريك الحياة المناسب
التوافق تكون فى نفس مستوي تفكيرك بيئتكوا شبه بعض طموحاتكوا واهدافكوا متقاربه وقبل ده طبعا القبول والراحه النفسيه وتكون تربيه راجل سيد قراره ومعروف بين الناس انه صاحب الكلمه الاولي والاخيره فى بيته وراجل تقي واتكا عل حته راجل تقي عند اختيار شريك الحياة المناسب ويعرف ف الاصول دي وطبعا دينها ده شئ بديهي وأظفر بذات الدين
اهم حاجة وعن تجربة اوعى تسمح لشريك حياتك انه يقلل منك او يقلل من اى شئ بتعمله لانه بجد بيحبطك نفسيا ومعنويا واوعى تسمح انه يهينك حتى لو بهزار #اختيار شريك الحياة المناسب
عند اختيار شريك الحياة المناسب دور على واحده تكون علي سجيتك معاها تبقي مش خايف من اي سوء فهم منها لتصرفاتك اختار واحده تفهمك و تحتويك علي فكره ممكن جدا تلاقي كده في الزواج التقليدي اللي جيلكوا رفضه في حين هو صح جدا... القبول في الاول و فتره الخطوبه بتبين الطباع و طريقه التفكير، يعني عندك فرصه تتعرف عليها كويس. ربنا يوفقك و يرزقك ببنت الناس الطيبين.
انا لما اختار شريك الحياة المناسب لازم يكون ليه فكر مختلف ليه نفس مبادئي وقيمي في الحياه لازم يكون علي قدر من التدين وبيصلي وبيخاف من ربنا.
لازم يكون طموح ويتحمل المسئوليه ويكون طيب وعطوف وودود
انت لو اعجبت بواحده اظن في فتره خطوبه اللي هي فتره تعارف بينكم وتقدرو من خلالها تحددوا هتقدرو تكملو مع بعض ولا.لا واظن من خلالها برضه بتقدرو تقيموا العلاقه دي فيها حب ولا مفيهاش الشكل مطلوب فى اختيار شريك الحياة المناسب الاخلاق والاحترام برضه مطلوبين والدين ..فاظفر بذات الدين
لو فتره الخطوبه مشاكلها كتير ومفيش احترام لبعض ولا تقدير يبقي مؤشرات العلاقه دي فاشله لان كل حاجه بتروح وبيفضل بينكم الموده والرحمه في النهايه ولو محستش بده من الاول يبقي تنهي العلاقه دي فورا
اهم حاجه لما تدخل البيت شوف مين الراجل ولو لقيت الدجاجه بتقوم بعمل الديك خد بعضك واخلع من سكات ولو لقيت الاب بيعطيك كلمه ويرجع بعد يومين يتصل بيك ويغيرها اعرف انه بيأخد التعليمات من المدام يبقى اغسل ايدك من البيت ده وامشى فورا طيب لو البنت معاك كويسه ايه المشكله ؟؟ اقولك ايه المشكله البنت لامها بنسبه 95% وهتحاول تقلد امها مع ابوها اللى ملوش كلمه ولو لقيتك راجل وكلمتك ماشيه على الكل هتبدأ تهددك بالقايمه وبالطلاق لانك طلعت ارجل من ابوها دى حقيقه مهمة عند اختيار شريك الحياة المناسب
عند اختيار شريك الحياة المناسب اهم حاجه انه يكون راجل ع خلق ويراعي ربنا فى الانسانة اللى هيرتبط بيها وانه يكون جدير بمسألة الجواز ويعرف انها مسئولية ومشاركه بين الطرفين واعباءها كتير وهنتخطاها فى اطار الايمان بالله والتقوى اللى بينا واننا مع بعض ف السراء والضراء
عند اختيار شريك الحياة المناسب بلاش تتغر باللى تقولك عاوزه زوج صالح لان اكتشفت ان الزوج الصالح عند اغلب بنات اليومين دول هو الزوج الحنين بزيادة النحنوح الدرويش الكيوت اللى لا بيسألها رايحه فين ولا جايه منين ولا بتستاذنه فى شىء ولا بيغير عليها من صداقات الفيس بوك والشارع وكل ما تطلب منه حاجه يقولها اللى تشوفيه يا حبيبتى !! ده مش زوج صالح ده صالحه
ابحث عن الام عند اختيار شريك الحياة المناسب
أهم شىء تكون مطيعه وصوتها مش عالى
اهم حاجة التفاهم قبل الحب لازم تكونو متفاهمين جدا وفى حجات كتير بينكم شبه بعض كل واحد فيكم يكون بيحلم بحياة شبه الحياة الى بيحلم بيها التانى تكون نظرتكم للمستقبل واحدة واهم حاجة كل واحد يتقبل التانى بمميزاته بعيوبه ببابا غنجوه كده لوكشة واحدة وكل واحد فيكم يبقي متاكد انه هيقدر يتاقلم مع عيوب التانى ويستحملها لان مفيش حد بيتغير علشان حد ومهم جدا تختار شريك حياة ناضج وتفكيره عالى وبيعرف يعدى وبيعرف يحتوى وتكونوا متمسكين ببعض كفاية مش من اول مشكلة حد يقول للتانى امشى فيمشي علشان ميحصلش طلاق ع حجات هايفة ولما تيجى تختار شريك الحياة المناسب الى يتقى ربنا ويخافه قبل ميخافك علشان تبقى مطمن ع نفسك معاه وعليه فى غيابك واختار الى تحب اولادك يطلعو نسخة منه بعيوبه بمميزاته بردو وبالنسبة للست لازم يكون راجل وبيتحمل المسئولية وبالنسبة لراجل لازم تكون ست عاقلة وفرفوشة ومش بتبص لغيرها ابدا وباقي الحجات بقي بتختلف من حد للتانى بس بلاش الناس العصبية ابعدو عنهم
ابحث عن عذراء القلب والمشاعر عند اختيار شريك الحياة المناسب
الادب الاخلاق الاهم فى اختيار شريك الحياة المناسب ومتعملش قياس ع تجارب حد لان ال ينفع لغيرك مينفعلكش والعكس
فى اختيار شريك الحياة المناسب لازم ميكونش سطحى و واضح مش غامض
عشان اى علاقه تنجح لازم يكون ف نقاش وقت المشاكل بدون زعيق ونحاول نفهم بعض تاني حاجه يلاقوا بعض لما يحتاجوا بعض ثالث حاجه يخليها رقم واحد ف حياته بعد ولده وولدته رابع حاجه من البدايه كدا يعلمها تكون صريحه معاه حتي لو هتجرحه ومتخبيش عنه حاجه وهو نفس الشئ خامسا والاهم يعرفها ظروفه وميهنهاش قدام اى حد ولو كانوا اهله وطبعا دور ع الاصل وراقب تصرفاتها لما تقع ف ديقه او مشكله الحاجات دى كفيله تخليك تعيشوا ف سعاده لو عملت بيها او تعيش ف جحيم لو تجهالتها
من كتر ماالأخلاق بقت واقعة بقى اختيار شريك الحياة المناسب بالنسبالى فى الحاجات الغير قابلة للغش زى تعليمه وظيفته شكله عائلته مستواه المادى ولوكل دا تمام يبقى تمام
الاحترام وعدم الاهانه ده الاهم فى اختيار شريك الحياة المناسب
للاسف الرجاله عاوزين يتجوزه وحده جسم هيفاء واليسا وفى رقه نانسى وفى اخلاق الحجه امه وفى رجوله ابوه فى الشارع وبدلع هيفاء فى البيت وتكون الدادا دودى مع عياله يمكن بعد ده كله تعجبه وهيجى وقت ويقولك تخنت ومقصره فى البيت تعالى يا عم الجينتل ياترى انت بقى زى مهند مثلا فى جماله ولا فى عضلات الشحات ولا فى رجوله واخلاق وعدل سيد الخلق فياريت بلاش شكليات فى اختيار شريك الحياة المناسب واختار الست الى تفتحه وتحافظ عليه مش تفتحه من وراك لاصحابك
عن تجربه لازم تدور عن الرجل الصالح ال يعينك علي دينك ودنياك لانو الراجل اللي مبخافش ربنا يقدر يعمل كل حاجه نفس الشيء بالنسبه للست لو مبتخافش ربنا تقدر تعمل كل حاجه ولنا في قول الرسول صل الله عليه وسلم القدوه والمثل الاعلي الذي قال ( تنكح المرأه لاربع لمالها ولجمالها ولحسبها ولدينها فاظفر بذات الدين تربت يداك) وقال ايضا: ( اذا جاءكم من ترضون دينه وامانته زوجوه الاتفعلوا تكن فتنه في الارض وفساد كبير ) اللي عايز يتجوز يروح للمتقيه لله في نفسها واهلها واللي يجيله عريس يدور علي خصلتين فيه ان يكون امين وعنده تقوي ودين ودا ممكن البنت تعرفه من طلباته منها الخاصه كلما كانت تغضب الله كان هذا عنوان عدم امانته معها ونفس الموصوع مع البنت وفق الله كل من اراد الحلال الي الزوجه الصالحه التي اذا نظر اليها سرته وان امرها اطاعته وان غاب عنها حفظته في نفسها وماله
ودى كانت جملة من التجارب والاراء للشباب من الجنسين على سؤالنا فى التجربة كيفية اختيار شريك الحياة المناسب فى موقعكم تجارب كوم انت كمان ممكن تضيف تعليقك على الموضوع فى الاسفل
تعليقات: 0
إرسال تعليق